Lo dijòus 25 d’abril passat, un moment fòrt pels establiments Calandreta de Lengadòc se tenguèt a la basa departamentala de Bessilhas, a Montanhac, en Erau, de 9h fins a 15h: lor 25n recampament annadièr.

Aquel recampament qu’es una jornada d’escòla en defòra de la classa èra lo ponch d’òrgue d’un trabalh pedagogic menat, long de l’annada, dintre aqueles establiments escolars que son de fogals de vida de la lenga e de la cultura occitanas. A Calandreta, l’occitan se viu en immersion tre la mairala, aquò permet als mainatges d’èsser d’ora bilingües en francés e en occitan e aquela jornada es tras qu’importanta pels calandrons perqué lor permet de véser que son pas isolats e sols a parlar la lenga.

Foguèt una bèla capitada.

Prèp de 1500 calandrons, de la mairala fins al licèu, escambièron e joguèron en occitan a l’entorn de jòcs, de danças, de talhièrs esportius (tambornet, rugbi de XIII, quilhas ...) menats per de regents e d’intervenaires e tanben coanimats amb de collegians e de liceans.

Una mòstra sus plaça recampava las produccions que los calandrons realizèron pendent l’annada, sul tèma “Sòmis e Remembres”.

A 13h, se trobèron, sul pradàs, per far petar amassa, escolans e adultes, lo Se Canta e La Sobirana e de se balhar rendètz-vos a l’an que ven.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…