L’ostau d’edicion Reclams que vien de publicar L’ors e las sasons, que conta l’istòria d’un ors qui espèra la nueit la mei longa de l’annada entà pintrar las montanhas de nèu e las huelhas de verd tà mei tard, entà preparar lo printemps a viéner, mercés a l’ajuda preciosa d’ua estela qui’s desarrapa deu cèu cada annada e pòrta l’ors sus las soas brancas.

L’ors qu’ei lo cap d’orquèstra de la seguida de las sasons. Ua faiçon poetica de presentar las sasons aus mainatges e aus mei grans.

Aquera dusau produccion entà la maison d’edicion gascona que hè reclam a la purmèra "Paraulinas" qui s’ei venuda sancerament. Qu’ei la cincau produccion d’Eva Cassagnet en direccion deu joen public, de las escòlas e de las familhas. Un public en demanda creishenta.

Las edicions Reclams qu’an anonciat ua creishença d’un 50% de libes venuts en 2023 per rapòrt a 2022. La recenta integracion de la literatura de joenessa dens las produccions de la maison d’edicion que sembla estar ua bèra escaduda.

Que disem la lenga en crisi mes que cau aver en cap lo hèit que lo nombre d’alfabetizats que creish mentre que lo nombre de locutors e baisha. Ua aumentacion de venta n’ei donc pas contradictòria.

CASSAGNET, Eva. L’ors e las sasons. Reclams 2024, 45 paginas. 12 èuros.