Lo 30 d’abriu passat, a Tarba, que comencè l’edicion 2024 de La Passem, la corsa qui a per mission de méter en lutz e promòver la lenga occitana, dens un esperit conviviau e inclusiu, shens competicion ni cronomètre. Desempuish la soa pumèra edicion en 2018, La Passem n’a pas cessat de créisher, dab un trajècte qui s’espandeish adara sus 1100 km de Tarba au Mont de Marçan, en sheis dias e cinc nueits. Au dia de uei, mei de 200 benevòls que’s son mobilizats, coordenats per un conselh d’administracion, entà assegurar l’escaduda de l’eveniment.

En 2024, La Passem qu’a pres ua envergadura navèra en traversant Bigòrra, Comenge, Armanhac, Bearn e las Lanas. Partint de Tarba e visitant 82 comunas. Los bigordans que son particularament implicats, dab 10 sectors de benevòls qui tribalhan entà enriquir l’experiéncia de la corsa.

La venta deus quilomètres que s’es mantenuda tostemps obèrta, en permetent enqüèra aus participants de causir lo lor itinerari en foncion deu lòc o deu moment preferit entà córrer. Los quilomètres que son venuts au prètz de 100 èuros, dab la possibilitat de crompa en version papèr o en linha suu sit de La Passem. Segon La Dépêche du Midi, lo cònsol màger de Tarba, Gérard Trémège, qu’inaugurè la soa venta la setmana darrèra en crompant lo purmèr quilomètre.

La darrèra edicion, en 2022, que permetè de collectar 67 000 èuros, en contribuint atau a sosténer catorze projèctes. Entà seguir l’eveniment en dirècte, que podetz descargar gratuitament l’aplicacion Ethos sus Play Store o App Store, e localizaratz lo ligam en temps reau.