Los Lops de Roergue an realizat una sason de primièra dins un campionat d’Elèit 2 ont an pas perdut cap de partida. En finala, rescontravan Vilagalhenc-Argon sus la pelena del Molin a Lesinhan. En tota logica, èran los primièrs dos de la fasa de classament que se disputavan lo trofèu. Lo resultat èra previsible: malgrat un adversari de qualitat, los roergasses tenguèron l’empresa sus la partida de la debuta a la fin: 14-8 a la pausa e 37-14 al final.

Aquel planchòt permet de mai a la formacion de tornar trapar un Elèit 1 qu’abandonèt en 2007. Una competicion que serà atal disputada per 10 formacions, en camin cap a l’objectiu de la Federacion de mesa en plaça d’un Tòp 13. La question demòra: ont trapar las 3 formacions suplementàrias? Dins los clubs existents (se pensa a Pàmias que deuriá montar en Elèit 2) o amb l’integracion de vilas bèlas (Lion, Bordèu, Niça…) mas amb de clubs de montar de A a Z?

Carcassona-Piàe Albi-Limós en mièjas finalas del campionat

Aquesta dimenjada se debanavan las partidas de barratge d’Elèit 1.

Dissabte, a l’Agulha, lo campion Limós recebiá St Estève-XIII Catalan. Los Dragonets marquèron los primièrs, menèron 10-0, mas al cap de 20 minutas la maquina limosenca se botèt en marcha per prene l’avantatge a la pausa 14-10 e confirmar long del segond temps per una larga victòria: 44-10.

Dimenge, Lesinhan jogava a Pià. Lo viatge en tèrra catalana foguèt un còp de mai negatiu per la formacion de Corbièras que pareguèt sens vam e mai tornèsse a 16-18 a quauques minutas de la fin per pèrdre fin finala 16-24.

Las mièjas finalas se faràn doncas acarar dissabte Albi e Limós en país tarnés, puèi dimenge Carcassona e Pià a l’estadi Domèc.

A Wigan, los Dragons tenon pas la distància

Dijòus, los catalans èran sus las tèrras del campion actual: Wigan. Marquèron una penalitat (A. Morgue), puèi un ensag pel pilar Julian Bosquet que Morgue transformèt. Una carga del davant Thomson tornèt menar los angleses a 6-8 just abans la pausa.

Lo segond temps foguèt a l’avantatge de Wigan que marquèt quatre ensages de mai, alara que los catalans ajustavan pas cap de punt a lor capital. Desfaita dels Sang e Aur: 8-30. Dissabte, los Dragons reçaupràn Leeds (18h30, a Brutus) que ven de batre Londres 46-8; Saldford va ganhar a Huddersfield 18-16. Warrington domina Hull FC: 24-6, e Hull KR marca dos còps mai de punts que Saint Helens: 40-20. Lo punt en aur servís pas de res a Castleford e Leigh que tornan al vestiari amb un 28-28!

Atal, 6 formacions se trapan en cap de classament amb 14 punts: Warrington, St Helens, Hull KR, los Dragons e Salford qu’an jogat 10 partidas e Wigan que n’a jogat 9.

En Championship, Tolosa jogava a Dewsbury: los occitans, menats a la pausa 10-19, prenguèron puèi lo dessús 38-21. Aprèp una dimenjada de pausa, Tolosa reçauprà puèi Barrow e Widnes a Ernèst Wallon.

NRL: los Pols an de braves esperons

Los Lapinons son totjorn pas dins lo còp: se fan manjar tot crus per las Pantèras: 12-42. Los Pols de Sydney son anats batre los Bròncos de Brisbane: 40-18. Canberra va ganhar a Manly 26-24.

Melbourne va batre los Titans 22-20 e los Dalfins empòrtan lo dèrbi de Queensland cò dels Vaquièrs: 28-26.