Lo 20 de mai de 1984, un grop de joves artistas s’amassèt pel primièr còp per las carrièras animadas del Cors Julien a Marselha. Èra pas solament una reünion musicala, mas la debuta d’una aventura qu’anava marcar l’istòria de la musica occitana. Massilia Sound System nasquèt aquel jorn, en portant amb el una fusion unica de ritmes reggae, de paraulas engatjadas e de l’esperit rebèl marselhés.

Abans quitament d’èsser un grop sus scèna, Massilia Sound System èra un vertadièr sound system a la faiçon jamaicana. Aquò significa qu’èran esquipats d’una sòno, de platinas per jogar de reggae, e d’una còla de DJ e de toasters per animar la serada amb lors paraulas. Menat per Prince Tatou, tanben conegut amb lo nom de Moussu T, lo collectiu èra en constanta evolucion, mas totjorn guidat per la vision e lo talent de son fondador.

Lor primièra aparicion publica foguèt brutalament interrompuda per la polícia, apelada per tarabast. Mas aquò a pas descoratjat lo grop. Al contrari, aquò foguèt la debuta d’una aventura de quaranta ans, marcats de musica, de resisténcia e d’engatjament.

Dempuèi alara, Massilia Sound System a sortit dètz e sèt albums, realizat un film documentari aclamat e quitament publicat un libre sus lor istòria pivelaira. Mas aquò es pas tot. En 2022 e 2023, Manivette Recòrds lor ofriguèt l’escasença de tornar vesitar vint de lors mai grands classics. Aquelas cançons, acompanhadas de lors versions instrumentalas, son d’ara enlà disponiblas dins dos cofrets de vinils 45 torns, en ofrissent als fans l’experiéncia sonòra autentica del grop.

E per celebrar lor quaranten anniversari, Massilia Sound System a previst quicòm d’especial. Lo 14 de junh de 2024, sortiràn un novèl album d’anniversari, que comprendrà dètz de lors títols emblematics, aital coma quatre novèlas cançons originalas en bònus. Disponible en vinil, en CD e quitament en caisseta àudio, aquel album es fin finala una celebracion de quatre decennis de musica.

Mas las festivitats s’arrèstan pas aquí. Massilia Sound System embarcarà tanben per una virada excepcionala per Occitània e enlà. De seradas que prometon d’èsser inoblidablas, cargadas de l’energia contagiosa qu’a totjorn caracterizat aquel grop que se pòt ja destacar dins l’istòria de la musica d’Occitània.

Alara, rendètz-vos lo 13 de junh de 2024 a 19h en çò de Còca Recòrds a Marselha per una serada d’excepcion. E pels que desiran de viure l’experiéncia de Massilia en dirècte, manquetz pas las datas de lor virada dels 40 ans. De mancar pas per totes los aimadors de musica, de libertat e de Massilia Sound System.

Torn dels quaranta ans:

Estiu 2024 :

• Dij 09/05 → ATE (84)Insane Festival
• Dis 15/06 → ST CHAMOND (42)Festival La Rue des Artistes
• Dis 22/06 → LESAN (30)La Fête Effrontée
• Dij 27/06 → MILHAU (12)Festival Natural Game
• Dis 29/06 → LA SANHA (83)Festival Couleurs Urbaines
• Dim 30/06 → MARMANDA (47)Garorock
• Div 05/07 → ANNEMASSE (74) Musical’Été (GRATUIT)
• Dis 06/07 → AUTRANS (38) Vercors Music Festival
• Div 12/07 → ST-MALÔ-DU-BOIS (85)Festival de Poupet [COMPLET]
• Dis 13/07 → AMBRUN (05)Trad’In Festival
• Div 19/07 → MARSELHA (13) Vieux Port - L’Été Marseillais (GRATUIT)
• Dim 21/07 → ARLE (13)Les Escales du Cargo
• Div 26/07 → SETA (34)Théâtre de la Mer
• Dis 27/07 → SANT LAURENÇ DE CARNÒLS (30)Les Estivales du Gub

Auton 2024:

• Div 27/09 → TOLOSA (31)Le Bikini
• Dis 28/09 → MONTELAIMAR (26)Le Palais des Congrès
• Dij 17/10 → CHASTELAIRAUD (86)L’Angelarde
• Div 18/10 → VITRY (94)Le Kilowatt
• Dis 19/10 → LILLA (59)Le Splendid
• Div 15/11 → LUNÈL (34)Salle Georges Brassens
• Dis 16/11 → AIS DE PROVENÇA (13)Le 6MIC
• Dij 21/11 → LION (69)La Rayonne
• Div 22/11 → CAORS (46)La Prade
• Dis 23/11 → BOISSUELH (87)Espace Crouzy
• Dij 28/11 → ROAZHON (35)L’Etage
• Div 29/11 → ONDRES (40) Salle Capranie