Benny Gantz, membre del gabinet de guèrra israelian, lancèt un avertiment sevèr pendent una conferéncia de premsa dissabte passat, declarant que Israèl se dirigissiá cap a un desastre, çò rapòrta Almayadeen. Segon Gantz, que foguèt de 2011 a 2015 cap d'estat-major de l’armada israeliana, una minoritat pichona de fanatics mena lo país a sa pèrda, e lo primièr ministre Benjamin Netanyahu, un còp èra un patriòta israelian, a permesa aquela situacion en metent sos interèsses personals e politics abans los besonhs existencials de l'estat.

Dempuèi l'ataca de l’Hamas lo 7 d'octòbre de 2023, Israèl es cabussat dins una guèrra existenciala. Gantz a criticat Tel Aviv per aver pas presas las mesuras necessàrias per garentir los objectius d'aquela guèrra. A insistit sul fach que la victòria pòt pas èsser obtenguda que per una estrategia clara e realista, en exigissent aital un cambiament immediat dins la direccion del país.

Gantz lança un ultimatum a Netanyahu, en exigissent que lo primièr ministre prenga sièis mesuras estrategicas especificas abans lo 8 de junh pertocant Gaza, lo retorn dels ostatges, los esfòrces de normalizacion amb los estats arabis e plan d'autras causas encara. Menaça de quitar lo govèrn s'aquelas condicions èran pas emplenadas, en soslinhant que Netanyahu deu causir entre la division e l'unitat, entre la victòria e lo desastre.

Aquela declaracion interven après de criticas similaras de Yoav Gallant, ministre de la defensa e membre del Likud, qu'a denonciada la gestion de Netanyahu. Gallant e Gantz an totes dos avertit que Netanyahu mena Israèl a la catastròfa en cedissent als elements d'extrèma drecha de la coalicion.

Pasmens, malgrat aqueles avertiments, sembla que Netanyahu accèpta pas las demandas de Gantz, qu'incluson la normalizacion potenciala amb l’Arabia Saudita e un servici nacional obligatòri per totes los israelians, de proposicions rebutadas pels partenaris ultraortodòxes e d'extrèma drecha de Netanyahu.

Se Gantz e son partit quitan lo govèrn, Netanyahu poiriá tornar a una coalicion mai estrecha mas mai extremista, çò que poiriá encara aflaquir lo sosten internacional d'Israèl. Tot comptat e debatut, l'ultimatum de Gantz poiriá sufire pas a cambiar la dinamica actuala, daissant Israèl en una situacion politica e securitària precària.

Tot aquò se produtz una setmana après que de milièrs de personas manifestèron a Tel Aviv per exigir la demission de Netanyahu e l'arribada d'un acòrdi per la liberacion dels ostatges detenguts per l’Hamas. D'un autre costat, lo regèt internacional de la guèrra a Gaza s'acreis amb de mobilizacions dins las universitats del Mond entièr en exigissent la rompedura de las relacions entre lo mond universitari e las institucions israelianas.

Netanyahu fàcia a un mandat d’arrèst de la Cort Penala internacionala

En mai d’aquò, ièr diluns, lo procuraire de la Cort Penala Internacionala (CPI), l’escocés Karim Khan, emetèt un mandat d’arrèst contra lo primièr ministre israelian, son ministre de la defensa Yoav Gallant, aital coma tres dirigents de l’Hamas, dont son cap Yahya as-Sinwar, totes pels presumits crimes reprochats als dos camps dempuèi lo 7 d’octòbre passat, entre los quals l’exterminacion de populacions. De notar que la CPI es pas reconeguda per Israèl ni pels Estats d’Units d’America mas si per las autoritats palestinianas.