Per la segonda annada consecutiva, los escolans d’occitan del licèu de la Bòrda Bassa de Castras an aculhit pendent 2 jorns d’escolans de l’IES Madina Mayurqa de Palma (Malhòrca) dins l’encastre d’un escambi a l’entorn de las lengas catalana e occitana. Aquelas doas jornadas son estadas l’escasença pels liceans de participar a mantuna animacion a l’entorn de la lenga e la cultura occitanas.

Lo diluns 6 de mai, los escolans de Castras anèron a Tolosa per i trobar lors correspondents de Malhòrca arribats la velha e participar totes amassa als rencontres academics occitans. Aquela jornada organizada per l’associacion regionala de professors d’occitan CRÈO Tolosa amassèt mai de 600 escolans qu'aprenon l’occitan dins l’acadèmia. Los liceans, eles, foguèron recebuts a l’Ostal de la Region ont poguèron encontrar Benjamin Assié, elegit encargat de las lengas occitana e catalana, aital coma d’actors de la cultura occitana: Aure Séguier, informaticiana al Congrès Permanent de la Lenga Occitana, Marius Blenet, jornalista a France 3 e presentaire de l’emission Viure al País, Primael Despax, musician d’expression occitana que clavèt la jornada amb son concèrt en duo amb Chokri Trabelsi.

Per la segonda jornada, las activitats se perseguiguèron al licèu de la Bòrda Bassa a Castras. Los escolans de Malhòrca seguiguèron lors correspondents per una matinada de cors. L’aprèp-miègjorn, poguèron encontrar los membres del grop de rock occitan CXK, recentament tornats de Chicago ont enregistrèron lor darrièr album, e venguts a Castras a l’escasença d’un concèrt a la sala de concèrts castresa Lo Bolegason. Enfin, los escolans descobriguèron las danças tradicionalas occitanas a l’escasença d’un talhièr prepausat pel centre occitan del país castrés. Un vespralh clavèt aquelas doas jornadas ricas en rencontres.

L’escambi entre lo licèu de la Bòrda Bassa e l’IES Madina Mayurqa se perseguirà l’an que ven amb, probable, gràcias a la tota recenta acreditacion Erasmus de lor licèu, un desplaçament dels escolans castreses dins las Balearas.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…