capçalera campanha

Actualitats

InternacionalPolitica

Espanha, Irlanda e Norvègia reconeisson l’estat de Palestina

Israèl a apelat a consultas sos ambaissadors dins aqueles tres estats

Lo president de l'Autoritat Palestiniana, Mahmud Abbas, a exprimit sa gratitud per la decision e a considerat que s’agissiá d’una contribucion importanta a la materializacion de la solucion dels dos estats
Lo president de l'Autoritat Palestiniana, Mahmud Abbas, a exprimit sa gratitud per la decision e a considerat que s’agissiá d’una contribucion importanta a la materializacion de la solucion dels dos estats | PPI via ZUMA Wire / DPA

Tèxte legit

Tres estats europèus, Espanha, Irlanda e Norvègia, anoncièron ièr dimècres que reconeisserián oficialament l’estat de Palestina. La decision d’aqueles tres estats marca una virada significativa de la politica internacionala per çò qu'es del conflicte israelopalestinian. Aquela reconeissença es lo resultat de setmanas de contactes diplomatics dirigits per las autoritats espanhòlas e irlandesas amb la tòca d’obténer de sostens dins l'Union Europèa per una solucion fondada suls dos estats.

“Aquela reconeissença es pas contra degun, ni Israèl ni los josieus, ni tanpauc en favor de l’Hamas. Es un acte de patz, de justícia e de coeréncia", çò diguèt lo primièr ministre espanhòl, Pedro Sánchez. "Nos cal èsser sincèrs e reconéisser que n'i a pas pro. Netanyahu contunha de bombardar d'espitals e d'escòlas, en tot semenar la paur en los enfants e las gents innocentas ", çò apondèt en tot far una crida a l'accion dels païses que defendon los dreches umans.

L'anóncia arriba dos jorns après que lo procuraire de la Cort Penala Internacionala emetèt un mandat d’arrèst contra lo primièr ministre israelian, son ministre de la defensa Yoav Gallant, aital coma tres dirigents de l’Hamas, dont son cap Yahya as-Sinwar, totes pels presumits crimes reprochats als dos camps dempuèi lo 7 d’octòbre passat, entre los quals l’exterminacion de populacions. De notar que la CPI es pas reconeguda per Israèl ni pels Estats d’Units d’America mas si per las autoritats palestinianas.

Israèl a apelat a consultas sos ambaissadors en Espanha, Irlanda e Norvègia. Lo ministre dels afars exteriors israelian, Yisrael Katz, a assegurat qu’Israèl demorariá pas en silenci fàcia aqueles tres estats que, segon el, “mancan a sa sobeiraneitat e meton en perilh sa seguretat". A mai, Katz a menaçat de consequéncias grèvas.

Lo president de l'Autoritat Palestiniana, Mahmud Abbas, a exprimit sa gratitud per la decision e a considerat que s’agissiá d’una contribucion importanta a la materializacion de la solucion dels dos estats. "La decision d'Espanha, en aquestes moments, es una contribucion de païses que creson que la solucion dels dos estats es una opcion que representa las volontat e legitimitat internacionalas", çò a apondut.

 

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article