Vaduda en Tarn e gersesa d’adopcion, Fabienne Vayrette n’a pas eretat l’occitan a la neishença. Que l’a causit e aprés (CFPÒC e Collègi d’Occitània). Purmèr, que'u cantè e mesclè dab lo cabil de la soa amiga Amel Rekkhis dens lo duo Las Hilhas deu Vent. Puish, que l' escrivó dab contes entà mainatges (disponibles gratuitament sus Internet) e adara dab aqueth navèth libe.

Los personatges deus sons racontes, principaument hemnas, que’us coneishetz . Que’us crotzatz dab eths dens lo vòste quartièr o los vedetz a la television, pendent lo jornau deu ser. Ua emplegada de musèu, ua joena diplomada japonesa, un vielh òmi ucraïnian o un ecoactivista, tots qu’afrontan la vita e que lutan dab coratge e determinacion. Quitament s’aquò que significa ajustar la realitat. A la lor faiçon. Pr’amor que vòlen víver.

E víver qu’ei, donc, ua colleccion de racontes qui celèbra la luta e la determinacion deus individús de cap a las adversitats deu quotidian. Dens cada istòria, los protagonistas que vaden lo miralh de nosta societat, miralhant las soas lutas, los sons espèrs e la soa recèrca incessanta d’un aviéner melhor. Los racontes, escriuts en occitan gascon, que son non solament ua frinèsta sus la diversitat deus personatges, mes tanben un omenatge a la lenga e a la cultura occitanas qui Vayrette a hèitas soas dab abnegacion e passion.

VAYRETTE-PÉCHAL, Fabienne. E víver. Reclams, 2024. 128 paginas. 15 èuros