De cercaires italians sortisson de metre en evidéncia d’indicis que suggerisson que Vènus poiriá abrigar de volcans actius, çò rapòrta lo jornal catalan Ara. Aquela descobèrta, publicada dins la revista Nature Astronomy, repausa sus l’analisi d’imatges radar capturadas per la sonda espaciala Magellan entre 1990 e 1994. Malgrat qu’aqueles imatges revelèsson ja una superfícia semenada de volcans e de canals de lava solidificada, fins ara l’espessa atmosfèra venusiana a longtemps entravada l’observacion dirècta e precisa d’aquelas formacions.

La còla de l’Universitat Gabriele D’Annunzio a reexaminats aqueles ancians imatges e identificats dos novèls rajòls de lava, invisibles fins ara. Aquelas formacions novèlas, situadas sul volcan Sif Mons e dins la planura de Niòbe (Niobe Planitia, segon l’usatge internacional latinizant), daissan pensar que l’activitat volcanica sus Vènus poiriá èsser fòrça mai recenta e activa que çò que s’imaginava. Segon los cercaires, aqueles rajòls indican que Vènus poiriá èsser encara uèi una planeta volcanica.

Cap a una exploracion novèla de Vènus

Aquelas revelacions arriban a un moment clau, mentre que la NASA se prepara per lançar la mission Veritas, la primièra mission a destinacion de Vènus dempuèi los ans 1990. L’objectiu de Veritas es de comprene coma Vènus, un còp èra parièra a la Tèrra, es venguda una planeta tant ostila, amb una atmosfèra densa en dioxid de carbòni e amb de temperaturas qu’avesinan los 460 grases Celsius.

Suzanne Smrekar, la responsabla scientifica de la mission Veritas, soslinha l’importància de las descobèrtas italianas. Afirma qu’aqueles indicis guidaràn las futuras observacions de Veritas, que serà esquipada de tecnologias avançadas per cartografiar la superfícia venusiana amb una precision inedita. Segon Smrekar, la mission Veritas poiriá aital ofrir una compreneson mai aprigondida dels procediments geologics e volcanics en cors sus Vènus.

En soma, aquelas descobèrtas dobrisson una èra novèla d’exploracion per Vènus. Suscitan un reprim d’interès per aquela planeta misteriosa e poirián fornir de responsas crucialas sus l’evolucion dels environaments planetaris e las condicions necessàrias al desvolopament de la vida.