Se coneguetz aqueth espòrt occitan aperat oficialament jòc de bala ath tambornet? Originari de Lengadòc, era sua practica que s’espandish peth territòri occitan e per uns quantis païses europèus (Itàlia, Espanha, Alemanha, Païses Baishes, Anglatèrra, Escòcia, Irlanda, Àustria, Norvègia, Ongria) e tanben en Brasiu e Cuba. Que’s jòga en un terren arrectangular, que cau enviar era bala damb un tambornet en camp oposat e tornar-la, un pòc coma ath tènis mès sense hialat. Que’s pòden hèr esquipas de cinc o de tres.  

Eth an passat, eth collègi d’Aurinhac qu’organizèc un torneg intèrne ath quau participèren 45 gojats e gojatas de 5u, 4u e 3u dera opcion occitan. Enguan, un projècte mès ambiciós qu’a permés d’associar eths professors d’occitan e d’educacion fisica e esportiva de cinc establiments: tres det Comenge (Aspèth, Saliás e Aurinhac), un dera Gasconha Tolosana (le Hosseret) e un de Tolosa (collègi Calandreta del País Tolosan). En tot, que son 125 gafets de cicle 4 qu’an participat en aqueth prumèr tornei intercollègis de tambornet. Qu’an atau podut desvolopar competéncias esportivas, socialas… e tanben lingüisticas pr’amor que devián utilizar eth occitan enà compdar eths punts e nà comunicar enter eris pendent era partida.

Cada esquipa —que n’i aviá 35 en tot— qu’arrepresentava oficiosament un país. Era petita istòria ça ditz qu’eth Eqüator (Tolosa) a ganhat era finala contra Cuba (Aurinhac) mès eth essenciau n’é cap aquiu… Aquera prumèra competicion qu’é estat ua brava escajuda (felicitacions aths professors d’EPS deth Hosseret pera qualitat dera organizacion) e eths ensenhaires qu’an plan enveja de preparar ua segonda edicion en 2025 pr’amor, s’era copa a pres eth camin de Tolosa, eths calandrons que la tornaràn a botar en jòc eth an que venc.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…