Aqueste dimenge 2 de junh, la Prima del XIII se perseguissiá amb una tièra de finalas dels campionats de França:

• A Tonens, se jogavan las finalas femeninas: en U15-U17, l’Ententa Aigas Vivas-Limós bat Lesinhan: 30-0; en Desvelopament, al nombre d’ensages lo XIII Gascon empòrta lo trofèu aprèp una egalitat 24-24 amb Lesinhan; Entraigas bat Clairac 22-16 en Nacionala; en Elèit, egalitat a la pausa 12-12, mas novèla victòria de las Divessas Catalanas fàcia a l’Escura: 22-12.

• A Illa, se debanavan 3 finalas:

  • En Nacionala 2: Vilafranca d’Albi bat Sant Martin de Crau: 36-34.

  • En Nacionala 3: los Falcons de Toluges-Baó baton las Aglas de Vilanòva de Menerbés: 28-6.

  • En Nacionala 4: los de las Vals (d’Orbieu e de Danha) baton Sant Laurenç de Salanca: 20-12.

• A Sent Gaudenç, se jogava la finala de Nacionala 1 entre Pàmias e Realmont. Tot èra programat a Pàmias: refortiment amb de jogaires d’Elèit 1 e de jogaires experimentats, venguda d’australians. Atal, Pàmias aviá pas perdut una sola partida de la sason. A St Gaudenç, los Lops comptèron tròp sus la fòrça, mostrèron plan d’indisciplina e los tustaires passèron gaire de còps de pè. Resulta: la sola desfaita de la sason 26-29, lo trofèu partís a Realmont que deuriá montar en Elèit 2!

Pas de miracle a Saint Helens

L’infirmariá dels catalans es pas luènh d’afichar complet amb uèit titulars que podián pas jogar e d’unes per un brave moment. La formacion que se presentèt a Saint Helens èra remanejada: atal, l’arrièr Artús Morgue èra titularizat al talonatge. Los Sang e Aur marquèron los primièrs: un còp de pè dins l’esquina de la defensa anglesa de Jordan Abdull èra représ per Tom Johnstone. Los Sants egalizavan 6-6 abans la pausa e marcavan dos ensages tre la repesa. N’ajustèron puèi un, mas es Julian Bosquet (ensag transformat per Morgue) que clavèt la partida sus aquela novèla desfaita catalana: 12-24.

Atal, los Dragons se trapan 5ns al classament a 4 punts de St Helens e Wigan, a nautor de Salford, qu’a batut Londres 34-4, e amb dos punts d’avança sus Leeds. Quand se sap que i a sièis qualificats…

Dissabte, a Wembley, se jogarà la finala de la Cup entre Wigan e Warrington. Cò de las femeninas, oposicion Saint Helens-Leeds e en 1895 Cup (competicion del Championship e de la League One), finala Wakefield-Sheffield.

Warrington e Wigan se rescontravan ja aqueste dissabte sus la pelena dels Lops. Partida que virèt a l’avantage de Wigan: 19-18.

Los catalans tornaràn jogar lo dissabte 15 de junh amb la recepcion dels Leopards de Leigh a Brutus.

A Sheffield, los Andidracs an pas fait las causas a mièjas per servar la Cup d’Anglatèrra de XIII-cadieral: victòria fàcia a Wigan 81-18!

Tolosa se fa paur

Dissabte, lo TO anava rescontrar las Pantèras d’Halifax. Capitèron lo primièr temps per menar 30-0. A dètz minutas de la fin, los angleses tornèron a 24-30, mas una penalitat e un ensag transformat dins las darrièras minutas permeton als occitans de ganhar 38-24. Partida venenta: la recepcion de Doncaster lo 15 de junh.

Austràlia: los State of origine en mitan de setmana

Aqueste dimècres, a Sydney, se jogarà la primièra de las tres partidas dels State of Origine entre Queensland e Nòva Galas del Sud. L’endeman, a Newcastle, segonda confrontacion de la sason per las formacions femeninas.

La preparacion de las seleccions empacha pas lo campionat NRL de se persègre, amb 5 rescontres al programa.

Pel compte de la tretzena jornada, Cronulla pèrd un segond còp en seguida: desfaita a Parramatta: 22-34. Las Làmias sèrvan ça que la la primièra plaça vist que los Dragons van dominar Penrith: 22-10 . Los Dògols van batre Newcastle: 32-2. Al punt en aur, Canberra ganha cò dels Dalfins: 26-25. Los Vaquièrs despassan los Pols en fin de partida: 18-16.

Se parla de la creacion d’una 18a franquesa: un club representatiu de Nòva Guinèa-Papoa qu’integrariá la competicion en 2028.