CAPÇALERA PAIS INVISIBLE

Actualitats

CulturaSocietat
crotz-tolosaCreated with Sketch.ProvençaComtat de NiçaCostiera Niçarda

Nos a quitats Ben Vautier, lo gèni irreverent de Niça

Reconegut internacionalament, foguèt artista plastician, agitaire public, critic d’art, poèta, fotograf, pintre, decoraire, editor de libres e defensor de la causa occitanista

Nos a quitats Ben Vautier, lo gèni irreverent de Niça
Nos a quitats Ben Vautier, lo gèni irreverent de Niça | Nissa Pantai

Tèxte legit

Benjamin Vautier, conegut coma Ben, defuntèt ièr dimècres 5 de junh dins son ostal de Niça a 88 ans. Segon d’informacions de BFMTV, l’artista foguèt trobat amb una bala dins lo cap, e per ansin las autoritats an dobèrta una enquista per ne determinar las circonstàncias. Se privilègia l’ipotèsi del suicidi, l’endeman de la mòrt de sa molhèr Annie, amb la quala èra fòrça unit.

Reconegut internacionalament, Ben Vautier non èra pas solament un artista plastician, mas tanben un agitaire public, critic d’art, poèta, fotograf, pintre, decoraire e editor de libres. Nasquèt a Nàpols lo 18 de julhet de 1935. De maire occitanoirlandesa e paire francosoís, passèt son enfança dins divèrses païses coma Turquia, Egipte, Grècia e Itàlia, abans de s’establir a Niça en 1949. Foguèt un grand defensor de las lenga e cultura occitanas.

“La sieu partença es un gran dolor per ieu perque lo conoissii personalament despí mai de 25 ans. Cen que vorrii tenir a ment d’eu es qu’èra occitanista e etnista. Conoissèt lo Francés Fontan (fondador dau PNO) a Niça a fin dei ans cinquanta. Sostenia lu pòbles en lucha per la sieu lenga e la sieu cultura. Èra d’un gran sosten emb la sieu escritura per Niça Pantais-Centre Cultural Occitan País Niçard e Alpenc. Avia finda sostengut lo nissart, la moneda locala de Niça...” , çò a dich a la redaccion de Jornalet Cristòu Daurore, vicepresident de Niça Pantais.

De son caire, lo cònsol màger de Niça, Christian Estrosi, a exprimit son dòl e a anonciat que la comuna rendriá un omenatge a l’artista “a l’autor dau sieu gèni”.

Èra plan conegut per sas frasas filosoficoartisticas, sovent escrichas sus de quasèrns, estuges e sacs d’esquina, que lo faguèron venir popular demest los mai joves. Foguèt un digne eiretièr dels dadaïstas e de Marcel Duchamp, e un representant important del movement Fluxus, conegut per sos happenings e accions de carrièra.

En 1959 se maridèt amb Jacqueline Robert, una afogada del nòu realisme e de Marcel Duchamp. A comptar d’alavetz, l’òbra de Ben se centrèt sus la poesia calligrafiada, l’apropriacion e la provocacion. Transformèt tanplan sa botiga de disques en una òbra d’art, en decorant la faciada amb un comol d’objèctes eteroclits. Desvolopèt sa teoria del “nòu art” e participèt a d’eveniments artistics importants coma la Misfits Fair de Londres e lo festenal d’expression liura de Jean-Jaques Lebel. En 1964 se maridèt amb Annie Baricalla amb qui aguèt dos enfants, Éva Cunégonde e François Malabar.

Ben èra tanben conegut per son afeccion particulara per colleccionar de bidets, en omenatge a Marcel Duchamp. Dins una entrevista a Paris Match en 2016, reconeguèt èsser un “panaire de bidets”, en los amassant per los emplir de flors dins son jardin.

Ben Vautier daissa un legat impressionant dins lo mond de l’art contemporanèu, amb una òbra marcada per l’irreveréncia, la provocacion e una prigonda reflexion filosofica. Sa mòrt representa una granda pèrda per la comunautat artistica niçarda, occitana e universala, per totes aqueles qu’an admiradas son òbra e sa personalitat unicas.

 

 

 

 

 

 

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article