L’associacion catalana de mèdias AMIC (Associacion de Mèdias d’Informacion e Comunicacion) a començat d’elaborar un trabalh collaboracion amb los mèdias de proximitat occitans, mai que mai las ràdios associativas de la region administrativa occitanocatalana. Après agir amb los mèdias nòrd-catalans, l’associacion que se bat pels mèdias de proximitat fa sos primièrs passes en Occitània, mai que mai amb los mèdias occitanofòns.

Lo secretari general de l’AMIC, Josep Ritort, presentèt aquel projècte lo dijòus 6 de junh pendent lo Congrès Nacional de las Ràdios Associativas de França, que se tenguèt a Narbona. En aquela escasença, Ritort participèt a una taula redonda sus las experiéncias internacionalas, conjonchament amb Josep Lluís Vidal, director de Ràdio Marina (associada a l’AMIC); Albert Noguer, director de Ràdio Arrels; e Jean-Marc Dubreuil, de l’associacion WorldDAB.

Lo congrès, qu’aguèt luòc de dimècres a divendres, tractèt divèrsas questions d’interès comun, coma lo desplegament de la ràdio numerica, lo DAB+, e l’educacion mediatica. A mai, se menèt a bon tèrme d’obradors tecnics e d'amassadas professionalas amb mantun organisme.

Las ràdios associativas constituisson lo principal modèl de ràdio de proximitat dins l’estat francés e son las qu’an portada la lenga occitana a las ondas.