De dimenge de matin, a 1h aperaquí, un bus que portava de passatgièrs de Marselha a Múrcia davalèt una penda de 50 mètres en sortissent de l’autoestrada A9, quand passava per Fitor. En seguida de l’accident dos passatgièrs moriguèron. Un passatgièr l’an mes en gàrdia a vista perque auriá fach lo còp de volant que provoquèt l’accident.

L’accident d’autocar se passèt a qualques 300 mètres de l’airal de servici de Fitor. L’autobús demorèt sus un costat amb l’estructura deformada après aver davalat una penda de 50 mètres.
 
An detengut un passatgièr qu’auriá provocat l’accident, coma o a reconegut el meteis, e mai se las versions dels passatgièrs son contradictòrias. Se tracta d’un òme de 29 ans venent d’Ucraïna qu’auriá forçat lo volant del veïcul. L’òme es estat internat d’ofici dins un servici psiquatric a Limós (Rasés).
 
Lo suspècte, qu’anava vesitar sos pròches per l’autocar, sofrís de bofadas delirantas de tipe paranoiac, segon lo psiquatre que l’a examinat. “Aquò vòl dire que lo passatgièr […] seriá irresponsable de sos actes”, çò diguèt lo procuraire David Charmatz, que tanben precisèt que li farián mai d’examens.
 
Aquel autobús, de la societat espanhòla Gómez, èra sostractat per Eurolines per ligar Marselha e Múrcia. Lo menaire ne “perdèt lo contraròtle 70 mètres abans l’impacte” segon Charmatz. Lo bus percutiguèt la guida de securetat e davalèt la penda sus las quatre ròdas abans de s’immobilizar sul costat drech. Lo menaire “es en realitat considerat uèi coma una victima segon los passatgièrs”, çò apondèt lo procuraire.
 
L’òme arrestat serà examinat tornarmai. Aviá pas cap d’antecedent dins l’estat francés e son a verificar se n’aviá en Ucraïna.
 
Tocant las victimas, “es uèi plan complicat per elas de concebre que [l’autor dels faches] poiriá èsser penalament non colpable dels faches qu’a comés” segon lo procuraire.