Carles Puigdemont, president de la Generalitat de Catalonha en exili, a respondut a la cap del Recampament Nacional, Marine Le Pen, que menaça de lo fòrabandir de l’estat francés se ganha las eleccions legislativas. Dins un messatge publicat suls rets socials, Puigdemont acusa Le Pen d’agir coma mariòta del partit espanhòl Vox, d’extrèma drecha franquista: “Justament, soi a París. Non solament me pensi d’i tornar mas afrontarai totes los assages d’aplicar de leis franquistas qu’empedisson la libertat de movements dels ciutadans europèus”, çò assolida.

Le Pen, dins una entrevista publicada per El Periódico de España e El Periódico de Catalunya, critiquèt la campanha de las eleccions catalanas que la faguèt Puigdemont en Catalonha Nòrd en tot assegurar “qu’umiliava França”. A mai, apondèt que, se ganhava las eleccions legislativas, permetriá pas aquela situacion. “França servís un còp de mai de luòc de referéncia pels criminals. Pòdi dire que, se ganham las eleccions, aquela situacion durarà pas gaire. Serem implacables amb totes los qu’atacan las institucions legitimas de lor país, mai que mai se son de païses amics e sòcis", çò declarèt Le Pen.

Això de Marine Le Pen, que ha actuat com una titella dels franquistes de VOX, m’ha ensopegat justament a París. No només hi penso tornar sinó que plantaré cara a tots els intents d’aplicar lleis franquistes que impedeixen la llibertat de moviments als ciutadans europeus. pic.twitter.com/4Pa0i8Y5oM

— krls.eth / Carles Puigdemont (@KRLS) June 17, 2024