Aqueste dissabte 22, la tòca primièra dels Dragons Catalans èra d’arrestar l’espirala de la desfaita amb la recepcion d’Huddersfield. Jordan Abdull faguèt virar canturla amb tres de sos còps de pè transformats en ensages. Amb quatre ensages e tres transformacions, los Sang e Aur menavan 22-0 a la pausa. A la represa, las causas se compliquèron que los catalans marquèron pas cap de punt e qu’a dètz minutas del tèrme, los Gigants tornèron a 18-22 mas la defensa locala tenguèt còp.

Doas formacions an ganhat al defòra: Hull KR a Castleford 13-12 e Warrington cò d’Hull FC: 24-18. Wigan passa 36 punts a Londres: 36-0, e Leeds domina Leigh: 18-10. Fa temps que li èra pas arribat mas Salford capita de batre St Helens: 20-18.

Los catalans se tornan plaçar en cinquena posicion abans lo desplaçament cò d’Hull KR lo dissabte 6 de julh.

Championship: lo TO sus sa lançada

Los tolosans èran en desplaçament a Batley. Signan una novèla victòria sens encaissar de punts: 36-0, e s’installan d’aise dins las primièras plaças del classament.

Aqueste dissabte 29, a Ernèst Wallon, lor partida fàcia a Featherstone clavarà una jornada entamenada amb los afrontaments de las formacions femeninas e masculinas de França e d’Anglatèrra.

Las Blavas qualificadas per la Copa del Mond

L’esquipa de França femenina jogava aqueste dissabte a Belgrad, jos una calor de 38°, una partida qualificativa per la Copa del Mond fàcia a Serbia. Las Blavas faguèron la diferéncia dins lo primièr temps (34-0) per emportar la victòria 58-0.

Autra formacion qualificada: Galas, qu’es anada batre las neerlandesas: 48-6.

En esperant lo segond State of Origine

La segonda oposicion de l’an de l’State of Origine se debanarà aqueste dimècres 26 de junh a Melbourne. Queensland sembla en capacitat d’emportar la tièra de 2024 tre aquesta partida.

En consequéncia, la jornada del campionat prepausava pas que cinc partidas. Melbourne confirma sa primièra plaça en anent batre los Dalfins: 30-24. Los Titans atomizan los neozelandeses: 66-6. Los Polets son mai fòrts que los Dògols: 26-8, e los Lapinons perseguisson lor convalescéncia en batent Manly: 14-0. Los Tigres dominan Canberra 48-24 e daissan la darrièra plaça a las Anguialas de Parramatta.