CAPÇALERA PAIS INVISIBLE

Actualitats

InternacionalPoliticaSocietat

Julian Assange es en libertat après un acòrdi amb los Estats Units

A passat mai d’un decenni embarrat per aver publicat d’informacion confidenciala, e s’èsser engatjat per la libertat de la premsa

Tèxte legit

La Nauta Cort de justícia de Londres a daissat, enfin, en libertat jos caucion lo fondador de WikiLeaks, Julian Assange. Foguèt encarcerat pendent mai de cinc ans dins una preson de seguretat maximala a causa del mandat d’arrèst e d’extradicion devèrs los Estats Units per aver difusat de documents secrets delicats per las autoritats estatsunidencas. Abans son encarceracion aviá passat sèt annadas refugiat dins l’ambaissada de l’Eqüator a Londres.

Assange e lo Ministèri de la Justícia dels Estats Units son arribats a un acòrdi segon lo qual lo jornalista se declara colpable contra una senténcia equivalenta a 62 meses de preson, çò es lo temps que lo passèt encarcerat al Reialme Unit. Per tant, es estat mes en libertat e mai, formalament, l’acòrdi aja d’èsser aprovat per un jutge que, probablament, o farà uèi.

“Julian Assange es liure. Sortiguèt de la preson de seguretat maximala de Belmarsh lo 24 de junh de matin, après i aver passat 1901 jorns. La Nauta Cort de Londres li a concedit la libertat jos caucion e es estat liberat a l’aeropòrt de Stansted, dins lo tantòst, ont es pojat a bòrd d’un avion e a quitat lo Reialme Unit”, çò publiquèt WikiLeaks suls rets socials.

Assange es tornat en Austràlia, son país d’origina, per rescontrar sa femna, Stella, e sos enfants “qu’an conegut solament lor paire en preson”, çò denóncia WikiLeaks. “Vaquí lo resultat d’una campanha mondiala qu’a inclús d'activistas de basa, de defensors de la libertat de la premsa, de legislators e de caps de tot l’espèctre politic, fins a arribar a las Nacions Unidas. Aquò a creat l’espaci per un periòde de negociacions longas amb lo Ministèri de la Justícia dels Estats Units, qu’a culminat en un acòrdi qu’es pas encara conclús formalament”, çò apond lo sit informatiu.

Los messatges son acompanhats d’un vidèo que s’i vei Assange en libertat pojant dins l’avion.

 

 

 

 

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Jòrdi Caldentey Manacòr (Malhòrca)
2.

Lo catalan modèrn, quand a doas opcions gramaticalas parièras de corrèctas, escuelh totjorn, totjorn, totjorn, la que se sembla mai a l'espanhòl. Pr'amor d'aquò, lo catalan modèrn a pas de sintaxi pròpria.

Per tal d'evitar que passe aquò meteis amb l'occitan, prepausi que, quand i a doas opcions parièras de corrèctas, escuelhèm la que se diferéncia mai del francés e pas la que s'i sembla mai.

Pr'amor que Lois Alibert admet dins sa Gramatica Occitana coma corrècte que i aja acòrdi (e tanben que no n'hi aja pas) entre lo genre e lo nombre del participi passat amb l'objècte dirècte, doncas, vos prepausi que, en luòc de "per aver publicat d’informacion confidenciala”, “per aver difusat de documents secrets delicats”, “aviá passat sèt annadas refugiat”, “après i aver passat 1901 jorns”, “La Nauta Cort de Londres li a concedit la libertat jos caucion”, “una campanha mondiala qu’a inclús d'activistas de basa”, en luòc de tot aquò, prepausi que digam "per aver PUBLICADA d’informacion confidenciala”, “per aver DIFUSATS de documents secrets delicats”, “aviá PASSADAS sèt annadas refugiat”, “après i aver PASSATS 1901 jorns”, “La Nauta Cort de Londres li a CONCEDIDA la libertat jos caucion”, “una campanha mondiala qu’a INCLUSES d'activistas de basa”.

Mercés per la vòstra atencion.

  • 1
  • 1
Free as a bird (Liure coma un aucèl)
1.

Aquesta justicia americana es espantanta e de mal compréne . Pendent d'ans nos diguèron qu'aquel paure Assange riscaria s'èra escampat als Estats Units la pena capitala o la preson a perpetuitat e vaqui que fins finala es liure de tornar al seu. Om es content per èl d'aquesta fin urosa mas tras que perplèx sus las arcanas de la justicia U.S.

  • 4
  • 0

Escriu un comentari sus aqueste article