Actualitats
Los Joves de Meloni exaltan lo faissisme davant de deputats e eurodeputats
A esclatat un escàndol en Itàlia, quand los joves de Giorgia Meloni celebrèron lo regim faissista en preséncia de deputats e eurodeputats
Tèxte legit
Una enquista en camèra amagada de Fanpage.it captèt Flaminia Pace, dirigenta de Joventut Nacionala, a lausar Mussolini, mentre qu’aviá publicament negat lo caractèr faissista de son partit, çò rapòrta Vilaweb.
En se qualificant de “la melhora joventut”, aqueles militants son qualificats de “joves meravilhoses” per Giorgia Meloni e considerats coma “l’arma e la fòrça motritz” de Fraires d’Itàlia. Pasmens, darrièr las colissas de Joventut Nacionala, los joves celèbran lo faissisme, s’exclaman en disent “Duce!” en referéncia a Mussolini o “Sieg Heil!” en referéncia a Hitler, e cridan al retorn del terrorisme neofaissista.
L’enquista de Fanpage.it revèla qu’aqueles joves participan a de concèrts d’extrèma drecha, fan la saludacion faissista e cantan d’eslogans coma “boia chi molla” (“qui abandona es un traïdor”). Aquelas accions, toleradas e de còps encoratjadas, se tenon jols uèlhs dels dirigents del movement.
La secretària del Partit Democrata (centresquèrra, principala fòrça d’oposicion), Elly Schlein, a afirmat que la primièra ministra Meloni èra conscienta de las actituds faissistas dins son partit. Angelo Bonelli, pòrtaparaula dels Verds italians, e la basca Iratxe García, coordinatritz del grop socialista al Parlament Europèu, an tanben exprimit lor inquietud, en exigissent d’explicas publicas.
Fondada en 2014, Joventut Nacionala compta de milièrs de membres e se presenta coma lo movement de joventut mai significatiu demest los partits italians. Pendent lo festenal annadièr de Fraires d’Itàlia, Meloni mercegèt aqueles militants joves per lor engatjament.
L’enquista revèla tanben que Flaminia Pace, en privat, manifestava lo desir de votar per “lo Duce tres còps” a las eleccions europèas, insultava las minoranças e encoratjava l’utilizacion d’eslogans faissistas. A evocat tanben sos ligams familials amb de figuras istoricas del terrorisme neofaissista.
Las camèras de Fanpage.it an captat de deputats e eurodeputats italians a far de gèstes faissistas dins los locals del movement. Aquelas revelacions an empench de membres del Parlament Europèu a demandar d’explicas a Giorgia Meloni e son partit.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
"Demandar d’explicacions a la Meloni e a son partit" ? Mas non fa cap de besonh qualque explicacion que siá !!! Un partit fascista, un partit franquista, un partit nacional-socialista, un partit petainista e/o maurassian son çò que son, ni mai ni mens. Sonque los nècis e los estabosits non los veson per çò que son… Tomban de la luna, o qué ? Un fascista es un fascista, coma un albre es albre.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari