Las còstas mediterranèas, en particular la mar d’Alboran, son identificadas coma de zònas de fòrta activitat simica, çò rapòrta L’Indépendant. Aquò significa que de regions que van de Valéncia a Màlaga, e mai las illas Balearas, poirián èsser tocadas per un tsunami màger. La còsta atlantica espanhòla, sustot a l’entorn de la falha marina d’Averroès, es tanben expausada a de risques. Aquela falha poiriá engendrar d’èrsas de sièis mètres de naut, qu’atenherián las còstas en solament 21 a 25 minutas après lo sisme. Segon l’estudi “Probabilistic Tsunami in the Mediterranean Sea”, realizat en 2023 e recentament publicat dins la revista Géophysique pure et appliquée, lo cambiament climatic aumenta las probabilitats de catastròfa.

La Comission Intergovernamentala dels Oceans de l’UNÈSCO a avertit que la probabilitat d’un tal tsunami es pròcha del 100% dins las 30 annadas venentas, en soslinhant l’urgéncia d’installar un sistèma d’alèrta als tsunamis. Las previsions vàrian segon las regions, per exemple a Huelva e Cadis, i a un 10% de risques d’una èrsa d’un mètre de naut, mas solament un 3% per una èrsa de tres mètres.

L’estudi precisa que la còsta cantabrica presenta lo risc mai feble, amb una montada de las aigas limitada a un maximum de mièg mètre. Invèrsament, las illas Canàrias poirián veire d’èrsasde mai de uèch mètres.

Un tsunami, un còp aviat, pòt traversar l’ocean lèu-lèu, en atenhent las zònas costièras alonhadas amb una energia destruseira. Mentre qu’un tsunami generat al sud-oèst del cap de Sant Vincenç prendriá mai o mens 40 minutas per arribar fins a Cadis, aquel generat en Argeria poiriá afectar las illas Balearas amb la meteissa demòra. De fach, a las Balearas ja sabon çò qu'es l'impacte de tsunamis. Lo mai recent foguèt lo 21 de mai de 2003, après un movement tectonic près d'Argeria, e causèt de damatges a de batèls amarrats dins los pòrts del sud de l'illa de Malhòrca.

Malgrat que sián rars, los tsunamis pòdon èsser fòrça devastaires, e recòrdan aital lo besonh de vigilància e de preparacion dins las zònas de risc.