De duos n’avèm crosat qualques unes, qu’es pas un format tant original qu’aquò, mas lo parelh Abdel-Jocelyn ten ça que la quicòm de plan particular. Jogar l’arabi que rescontra l’occitan, o l’occitan que rescontra l’arabi, pòt èsser dins l’aire del temps...D’unes pòdon pensar qu’aqueles dos artistas aprofièitan, en qualque sòrta, d’aquela èrsa simpatica per flotejar sus l’ocean de totas las bonas paraulas que cantan la tolerància e lo viure-amassa coma de règlas fondamentalas.... Levat qu’aicí jògan pas! Lo caminament artistic d’aqueles dos òmes es una causa, mas i an ajustat un camin ciutadan e filosofic que pòrtan al mai prigond de lor ventre coma de lor èime. Tre que parlan, mainatges, regents, parents sentisson sul pic que totas las frasas sonan justas e que cada mot fa sens. Las paraulas venon d’actes, los concèptes s’escafan per daissar plaça a de comportaments visibles, simples, sincèrs e exemplars. Que siá l’un o l’autre, lors dichas se completan e illustran tot çò que se jòga entre los mainatges. Los agaches càmbian, los a-priòris tomban, las mans se tendon mai naturalament e cadun es fièr de poder ajudar l’autre a dire e cantar l’occitan o l’arabi. Aüroses, los qu’an crosat aqueles dos òmes que sòmian pas un Mond perfèit mas que fan véser cossí viure e agir dins lo Mond d’ara. Arab’òc entraïna totjorn de Ò! e de A! gaireben dins totes los mitans autorizats mas l’idèa es de mal transformar en politica de fons. L’empatia, la simpatia, la simbolica o lo sosten moral an de segur de sens mas fan pas una politica. Çò que sabèm nosautres, es que Sénhers Abdel Bouzbiba e Jocelyn Papon an pas fait de rasonaments del temps d’aquelas annadas e, al delà de lors creacions, lor etica e lor engatjament an esclairat lo nòstre cèl. Nos sèm plan reconeguts coma de Fraires Sawa nosautres tanben. Bon camin a totes, gardarem la linha, e de segur qualques matins tornarem caminar ensems!

JFA
lo 24 de junh de 2024
Calandreta Carcassona

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…