Aqueste dissabte 29 de junh èra jol signe d’un triple afrontament entre franceses e angleses a l’estadi Ernèst-Wallon a Tolosa.

Cò de las femeninas, les Blavas encaissèron 20 punts dins lo primièr temps puèi 22 dins lo segond temps sens poder marcar lo mendre punt: victòria anglesa 42-0.

Cò dels òmes, França se presentava amb una formacion plan dragonèsca: dins lo 13 de despart, 10 Dragons de l’ora, un dragon partit à Wigan, Miloudi (Londres) e Griffièr que jòga en Australia. Los Pols marquèron los primièrs, menèron 8-0, mas a la pausa los angleses avián pres l’avantatge 14-8 que confirmèron dins lo segond temps: 40-8 amb un ensag sus la còrna marcat pel… Dragon catalan Tom Johnstone.

Lo Tolosa Olimpic clavèt la jornada amb una seisena victòria de tira e sens encaissar un punt fàcia a Fearherstone: 20-0, çò que plaça lo club en segonda posicion al classament. Aqueste dissabte 6 de julh, los occitans reçaupràn los Taures de Bradfòrd.

Los Dragons pensan a 2025

Aqueste dissabte 6, los Dragons aniràn desfisar Hull-KR, un adversari dirècte per la qualificacion.

Dins la setmana, lo club anoncièt doas signaturas per la sason venenta:

• l’alièr australian de Canberrà, Nick Cotric

• l’avant de Salfòrd, Oliver Partington

State of Origine: La tresena partida serà decisiva

Quensland aviá ganhat la primièra partida 38-18. Aqueste dimècres 26, las doas formacions se tornavan trapar a Melborna. Novèlas-Galas de Sud aviá rampelat Cameron Murray, Mitchell Moses e Latrell Mitchell. Los Blaus marcan dos ensags dins las vint primièras minutas. Van accelerar, rajustar dos ensags per menar 22-0 a la mièja-ora e 34-0 a la pausa. S’es vist una sola esquipa sus la pelena!

Queensland torna mai determinat mas s’acontentarà d’èsser mai eficaç en signant tres ensags per una desfaita sus la marca de… 18-38.

La tresena partida serà decisiva lo 17 de julhet a Brisbana per eterminar lo venceire de la seria 2024.

Cò de las femeninas, lo State of Origine se disputa ara tanben en 3 partidas. Las Blavas ganhèron la primièra; dins las dètz darrièras minutas de la segonda, Queensland l’emportèt 11-10; A Townsville, las jogairas de Queensland se mostrèron mai activas e ofensivas per ganhar 22-6 e emportar la tièra de 2024.

En seguida, sèt partidas èran al programa de la 17ena jornada de NRL.

Divendres, los Dògols l’emportèron al punt en aur fàcia a las Lamias: 15-14 .

Dissabte, victòrias a domicili per los neo-zelandeses fàcia als Cavals-fòls: 32-16, per Melborna fàcia a Canberrà 16-6 e pels Cavalièrs fàcia a las Anguialas: 34-26.

Dimenge, los Dragons dominan los Dalfins 26-9, los Vaquièrs s’impausan a Penrith 16-6 e los Polets son plan mai fòrts que los Tigres: 40-6.