En tot seguir la tendéncia europèa, l’extrèma drecha se vòl ara installar al poder legisalatiu francés. Après lo vam obtengut a las eleccions europèas, lo Recampament Nacional (RN) contunha d’èsser lo primièr del comptatge del primièr torn de las eleccions legislativas francesas de dimenge passat. Segon los primièrs resultats, la formacion ultradrechista, refortida amb los deputats LR qu’an seguit lo niçard Éric Ciotti, obtendriá a l’entorn del 29,25% dels vòtes. Guidat per Jordan Bardella, lo RN sembla beneficiar d’una mobilizacion istorica amb un recòrd de participacion a 17h del 59,39%, vint ponches de mai qu’a las legislativas de 2022. S’agís de las donadas pus nautas dempuèi 1978. Es lo primièr còp que lo partit lepenista es lo melhor plaçat a d’eleccions legislativas. En junh de 2022, obtenguèt lo 18,68% dels vòtes al primièr torn, la tresena fòrça mai votada, mentre que Marine Le Pen aviá tornarmai accedit al segond torn de la presidenciala. Aqueste còp, lo partit espèra de ganhar una majoritat relativa, o quitament absoluda, que permeta a Jordan Bardella de venir primièr ministre. Tot dependrà de la mobilizacion dels electors, davant d’actituds dels partits fòrça desparièras: l’esquèrra anóncia que retira sos candidats arribats tresens per evitar de far ganhar l’RN, mas la rèsta de drecha gaullista refusa per ara de causir entre l’esquèrra e l’extrèma drecha, e lo camp macronista es devesit. Lo president Macron crida a luchar contra lo partit de Le Pen e Bardella, son primièr ministre Gabriel Attal assolida que se desistiràn los candidats de sa coalicion per empachar una victòria de l’RN , mas son èx-cap del govèrn Édouard Philippe equipara La França Insomesa amb l’extrèma drecha.

En segonda posicion, se plaça lo Nòu Front Popular (NFP), una coalicion de partits d’esquèrra amassada per l’escasença, qu’obtendriá lo 27,99% dels vòtes. Malgrat las divisions passadas, l’esquèrra s’es reünida en beneficiant del sosten de figuras criticas de l’aliança precedenta amb La França Insomesa, coma Carole Delga e François Hollande, que poiriá èsser elegit deputat dimenge venent.

Lo macronisme, de son latz, patís una debranda amb environ lo 20% dels vòtes. L’escomesa d’Emmanuel Macron per dissòlver l’Assemblada Nacionala per fin d’aflaquir l’esquèrra e tornar mobilizar sa coalicion drechista centralista e liberala, a pas capitat en tot daissar l’avenir de Gabriel Attal a Matignon en l’aire. Los Republicans, afeblits per lor divisions intèrnas, contunhan lor declin amb lo 10% dels vòtes, del temps que Reconquista, lo partit xenofòb d’Éric Zemmour, s’esfondra amb 0,6%.

De notar, en Carcassés, que lo candidat de l’NFP, Philippe Poutou, que s’es posicionat en favor de l’occitan, aurà un segond torn complicat contra son adversari de l’RN, que li mancava sonque un ponch percentual per ganhar lo sèti de deputat.