Actualitats
Supression de l’emission Conta Monde
Desenant, lo sol rendètz-vos occitan prepausat a partir de la rintrada serà una cronica de 2 minutas d’actualitats culturalas occitanas los dissabte e dimenge de matin
Tèxte legit
Passat ièr, la darrièra emission foguèt difusada sus l’antena de France Bleu Occitanie. Es lo presentaire de Conta Monde, Geraud Delbès qu’o a anonciat sus sa pagina Facebook. Presentava l’emission en francés e en occitan dempuèi 13 ans, aviá pres la succession de Benaset Roux. Abans eles, Maurici Andrieu aviá agut presentat una autra emission del meteis semen: Passejadas occitanas. Amb la fin de Conta Monde, es una cadena de voses, difusada de contunh sul servici public dempuèi la Liberacion que se romp.
Entre lo passatge de Benaset Roux e de Geraud Delbès, l’emission passèt d’una ora a 24, puèi 21 minutas, amb l’interdiccion inexplicabla, dempuèi 4 ans, de passar de musica occitana durant l’emission.
Desenant, lo sol rendètz-vos occitan prepausat a partir de la rintrada serà una cronica de 2 minutas d’actualitats culturalas occitanas los dissabte e dimenge de matin.
La còla de Jornalet exprimís tota sa solidaritat amb Geraud Delbès e espèra qu’una mobilizacion massissa poirà capitar a tornar a l’occitan una plaça digna sus las ondas de France Bleu Occitanie, se lo mot Occitània encara a un sens.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
E la Delgà de que ditz ? De que fai la reina "d'Occitanie" ? Que quand cremèt la catedrala de Paris se mainèt, pecaire, de donar soùses per la tornar bastir alara que la lenga occitana crèba ! Se tracha encara, aquesta Delgà "reina d'Occitanie" que dins "Occitanie" i-a "occitan" ?
Sabi pas s’avetz près la mesura de l’ahar mes n’es pas sonque l’emission occitana que patís uèi, es tot lo servici public audiovisuau francés. Son a tot plegar tà véner aquò au mei generós, benlèu En Bolloré, o En Saadé. Malurosament, Conta Monda es pas qu’un damatge collaterau.
Quina ironia ! Es al moment que lo mot "Occitanie" senhorèja d'en pertot e a totas las sauças (i comprès dins lo quita nom local de la radio d'estat !!) que la caça a l'occitan se fa de mai en mai ferotja. Una agonia accelerada dins una indiferència grandassa.
Nòstra polida lenga occitana a pas besonh d'un enterraire en mai. Sénher Bruce de Galzain, ajudatz-la, ajudatz-nos !
De que ne disan los occitans ? Demandatz a Poutou e al Novèu Front Popular, pareis que serian d'occitans de tria, aqueles !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari