La 4u circonscripcion deus Pirenèus Atlantics coneguda com “la bascobearnesa” qu’a com particularitat de compréner a parts egaus duas entitats lingüisticas plan diferenciadas e afirmadas cadua a la soa faiçon. N’ei pas donc estonant de constatar que la question de las lengas ei estada dirèctament o indirèctament presenta dens aquesta campanha electorau. Que son estats sheis candidats qui s’afrontèn tau prumèr torn e que’n demoran tres tau segond. Shens entrar suu hons deus programas de cadun, qu’ei interessant de véder la plaça qui an aucupat las lengas deu territòri dens la literatura perpausada aus electors de Bearn, Sola e Baisha Navarra.

Prumèr, los huelhs e professions de fe estrictament monolingües francés que son los de l‘RN, d‘LO e estonantament los de Joan Lassala qui’s prevau deu son amor de la lenga mairau. En dus, los bilingües: qu’ei lo cas deus documents deu Partit Nacionalista Basco qui presentan los programas en francés e en basco. Que sembla que l’esfòrç hèit peu PNB aja desbrombat la partida orientau de la circonscripcion. Lo tresau cas qu’ei lo deus candidats qui dens los lors tèxtes dèishan paréisher testimònis de basco e occitan. Atau dens las professions de fe de Beñat Cachenaut (LR) que podem léger ua frasa en basco e ua en occitan dab ua causida ortografica inspirada de la grafia felibrenca. E tanben dens aqueth cas que trobam lo materiau electorau deu prumèr torn d’Iñaki Echaniz (NFP) dab títols de capítols en las tres lengas. Mes tau segond torn manifèstament lo candidat deu Navèth Front Popular qu’a optat per ua solucion mei qu’originau dens lo contèxte electorau, a saber presentar lo programa deu candidat en las tres lengas, lo francés, lo basco e tanben l’occitan.