De centenats de milièrs de manifestants, 30 000 segon la polícia, s'amassèron a Madrid per marchar fins a la plaça de la Puerta del Sol, en ensajar de reprene possession de l'endrech. Jols eslogans "Pren la carrièra", "Sèm pas pas de merças entre las mans dels politicians e dels banquièrs", los manifestants son arribats en sièis colomnas, dels diferents quartièrs de la capitala espanhòla, abans de prene la direccion de la Puerta del Sol, brèç del sieu movement  nascut lo 15 de mai de 2011. E mai s’avián l'intencion de s'i installar pendent quatre jorns, per i organizar una "assemblada permanenta", foguèron fòrabandits per la polícia qu'arrestèt 18 de las personas que volián demorar sus la plaça.
 
Las manifestacions foguèron tanplan nombrosas dins los Païses Catalans, mai que mai a Barcelona, Valéncia e Palma ont los manifestants faguèron d'assembladas sus las plaças après las manifestacions.
 
La manifestacion de Barcelona sortiguèt dempuèi la plaça de Catalonha, après aver amassat totas las colomnas que venián dels diferents quartièrs e vilas de l'entorn. La marcha se debanèt darrièr una plancarda que disiá: "12M-15M. Lo pòble es la solucion. Tornam sus las plaças, contunham sus la carrièra". Manifestèron 200 000 personas segon los organizaires e 45 000 segon la polícia.
 
Segon los organizaires, la protèsta comença amb la tòca de venir una assemblada permanenta de tres jorns, fins al 15 de mai, quand farà un an exacte dempuèi l'inici del movement. L'intencion es de coordenar l'accion del movement e de debatre sus las causas de la crisi, l'educacion, los mercats financièrs, etc.
 
Aital, tornar-mai sus la plaça de Catalonha, qualques milièrs de manifestants s'amassèron en assemblada per decidir sus divèrsas questions. Acabada l'assemblada, un campament s'es installat per tres jornadas.
 
Pertot, las consignas mai importantas son aquelas cinc: "Pas un èuro de mai per salvar las bancas", "Educacion e santat publica de qualitat", "Non a la precarietat del trabalh e non a la reforma", "Per una abitança digna e garantida" e "Renda basica universala".
 
Los indignats ensajaràn d’esperlongar las protèstas almens fins a dimars 15 de mai, per celebrar lo primièr anniversari del movement dins l'Estat espanhòl. Farà alavetz justament una annada que la plataforma "Democracia reala, ja!" apelèt a las manifestacions en enregant de campaments sus las plaças de fòrça vilas pendent mai d'un mes. Aital s'enreguèt lo movement dels diches "indignats", conegut dins l'Estat espanhòl coma movement 15M en referéncia a la data.