Lo 7 de julhet, los electors de la 6a circonscripcion dels Pirinèus Atlantics elegiguèron deputat Peio Dufau d’EH-Bai, un eveniment istoric essent que serà lo primièr sèti abertzale a l’Assemblada Nacionala francesa. Aqueste caminòt de 45 ans, adjonch fins ara al cònsol màger de Ziburu (Labord), es elegit jos la bandièra de l’union de l’esquèrra, mas son eleccion marca sustot un moment important del movement independentista basco dins l’estat francés.

Peio Dufau es d'efièch membre del partit abertzale patriòta) d’esquèrra basca EH-Bai, que milita pels dreches e per la sobeiranetat del pòble basco. Son entorn lo descriu coma un “valentàs engatjat e un menaire, mas que fa fisança als autres”. Plan implicat dins la vida associativa, Dufau es un bascofòn fervorós qu’encarna l’engatjament e la lucha per la preservacion de l’identitat basca.

En causissent Peio Dufau, los electors an non solament optat per un representant competent e engatjat, mas tanben per un militant abertzale que s’es presentat aqueste còp jos las colors del Nòu Front popular. “Davant la gravetat de la situacion, preferissèm de nos centrar sus las convergéncias en dominant las divergéncias”, çò explicava en junh Gaby Arestegi, pòrtaparaula d’EH-Bai. Pasmens, caldrà veire coma evoluirà aquela aliança, perque de partenaris de l'NFP (sustot de sectors de La França Insomesa o dels comunistas) se mesfisan de l’orientacion independentista de la formacion de Dufau.