capçalera campanha

Actualitats

Politica

Una quinzena de deputats autonomistas o independentistas a l’Assemblada Nacionala francesa

Resultat istoric pels canacs del temps que los còrses tenon còp e que los bascos mandan un deputat abertzale a París

Emmanuel Tjibaou es vengut lo primièr deputat independentista canac dempuèi 1986
Emmanuel Tjibaou es vengut lo primièr deputat independentista canac dempuèi 1986 | @LiveUpdatesUS

Tèxte legit

Un total de quinze deputats autonomistas o independentistas dels diferents pòbles minorizats de l’estat francés son estats elegits a l’Assemblada Nacionala francesa. Cap d’eles es pas occitan. Delà la preséncia d’un deputat abertzale a l’Assemblada Nacionala francesa, que raportàvem ièr, de soslinhar que los independentistas canacs an obtengut un resultat istoric mentre que los còrses an tengut còp, en perdent solament un de lors tres deputats. Lo breton Paul Molac es tornarmai elegit deputat.

Los canacs an obtengut, per quant a eles, un resultat mai positiu e quitament istoric: Emmanuel Tjibaou es vengut lo primièr deputat independentista canac dempuèi 1986. Aquò representa una estapa significativa pel movement independentista de l’archipèla, que mobilizèt una participacion del 73,06% al segond torn, çò rapòrta Nationalia. De fach, los independentistas canacs an recebut lo 52,46% dels vòtes mentre que los unionistas lo 46%. La diferéncia es d’aperaquí 10 000 vòtes.

En Corsega, lo front dich republican a capitat a arrestar l’avançada de l’extrèma drecha francesa al segond torn. Ça que la, los resultats son tanplan istorics pel Recampament Nacional (RN) sus l’illa puèi que tres de sos quatre candidats èran pervenguts al segond torn pel primièr còp, e mai los seguidors de Jordan Bardella e Marine Le Pen ajan totes mal capitat. Malgrat la desfacha d'un de lors deputats fàcia un candidat de la drecha francesa, los autonomistas an pogut servar dos mandats parlamentaris, çò que confirma l’importància del procès d’autonomia en Corsega., pasmens suspendut per l'incertitud politica en França.

En Bascoat, Peio Dufau, de la coalicion EH Bai, a fach istòria en venent lo primièr deputat abertzale a l’Assemblada Nacionala. Per contra, en Catalonha Nord l’RN s’es impausat dins totas sas circonscripcions.

 

Una quinzena de deputats “regionalistas”

 

Al total, totjorn segon Nationalia, i a una quinzena de deputats diches autonomistas o independentistas —diches “regionalistas”— e los trobarem dins de grops parlamentaris diferents. D’un latz i a lo grop Libertats, Independents, Otramar e Territòris (Libertés, indépendants, Outre-mer et territoires), qu’aculhís generalament los deputats de la federacion de Regions e Pòbles Solidaris (Regions et Peuples Solidaires, RPS) partits, coma los còrses Castellani e Colombani o lo breton Paul Molac, arquitècte de la coneguda Lei per la proteccion de las lengas minorizadas. Dins aquel grop coincidiràn tanben amb d’elegits de Guadalope Olivier Serva e Max Mathiasin e amb Stéphane Lenormand, de Sant Pèire e Miquelon.

D’autre caire, lo Nòu Front Popular a pas encara decidit se formarà un sol grop amb totes los partits o diferents grops parlamentaris per cadun dels partits que lo compausan. Aquí i trobam lo basco Peio Dufau, los martiniqueses Jiovanny William, Béatrice Bellay, e los independentistas Marcelin Nadeau e Jean Philippe Nilor. L’autonomista socialista de Guadalope Christian Baptiste, Jean-Víctor Castor e Davy Rimane de Guaiana o Steve Chailloux e Mereana Reid Aberlot de Polinesia i seràn tanben. E mai Emmanuel Tjibaou de FLNKS Canac.

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article