Eth trail running ei era practica de córrer a pè pera natura. En cas dera UTMB, s’agís d’ua Ultra trail, ei a díder ues corses de trail de longues distàncies (mès de 42 km).

Cada an, a començament de junhsèga a lòc en Aran er eveniment denominat “Val d’Aran by UTMB”, ua des corses de tota Occitània que mès public atrèn. Enguan an participat environ 6000 correires e 500 volontaris que hèn possible er eveniment.

Era finau de Chamônix (Arpitània), coneishuda coma Ultra Trail deth mont Blanc (UTMB), ei ua des corses de trail mès prestigioses deth mon, bèra ua des sues corses trauèrsen es termières politiques entre França. Soïssa o Itàlia. Entà poder participar en aquera finau cau obtier ua puntuacion en d’autes corses UTMB.

Laguens des diuèrses corses UTMB que i a pertot en mon, era Val d’Aran by UTMB ei ua des 3 “màgers” que i a ena planeta. Se considère “màger” aquera corsa UTMB qu’es sòns prumèri classats an accès dirècte ara finau dera UTMB en Chamônix. Ath delà, ua corsa “màger” autrege eth doble de puntuacion (Running stones) as finishers entath tiratge dera finau UTMB. Aquerò hè qu'aguest eveniment age un gran interès generau entàs passionats deth trail running.

Era corsa Val d’Aran by UTMB comencèc eth 3 de junhsèga damb era corsa des volontaris en pòble de Tredòs (5 km), pendent es següents dies aueren lòc es diferentes corses puntuables enquiath 7 de junhsèga.

Ua edicion damb un cèrt sabor amar

Aguesta edicion a acabat un shinhau melhor qu’era d’est’an passat, a on calec suspéner es dues corses mès longues, era CDH (110 KM) e era VDA a causa d’ua tempèsta electrica qu’arribèc de net e de faiçon imprevista quan es dues espròves èren en marcha. Enguan era organizacion ja ère assabentada dera possibilitat de tempèri e per tant se cambièc eth percors dera majoritat des corses. Ath delà, se cambièc eth percors dera PDA (55 KM) per comolacion de nhèu ena zòna de Còth de Pòdo a 2600 mètres de nautada. Pendent era net de diuendres a dissabte, damb es pròves CDH e VDA en marcha, se podec enténer per tota era Val d’Aran uns tròns benben fòrti que dauen pas a ua tempèsta, alavetz, era organizacion arturèc eth cronomètre e s’arturèren correires e avitalhaments entre 1h e 3h dera net. Fin finau, era CDH contunhèc mès era espròva mair, era VDA, se cancelèc a causa des marrides condicions metereologiques e der estat deth terren deth moment e deth dia següent.

Pendent es dies successius, se debanèren es corses de mens distància. Eth dia 6, se heren en Plan de Beret era Sky Master e era Sky promesas (18km), tanben damb eth percors modificat, qu’anaue de Beret enquiath Santuari de Montgarri e dempús tornaue tath plan de Beret. Totun, maugrat es modificacions, es ploges deishèren ua part deth percors fòrça hangassejat e en tot hèr que bèth tròç siguesse guaireben impossible d’auançar en tot córrer. De hèt, i auec un participaire que se trinquèc eth braç.

Era EXP (30 Km), era corsa que claue er eveniment

Eth dia 7 de junhsèga, en Vielha ja i auie mens ambient runner, pr’amor que s’auien disputat guaireben totes es corses, mès encara demoraue era EXP (Experience), ua corsa dessenhada coma prumèra experiéncia d’Ultra Trail de longa distància, que non auec cap d’incidéncia meteorologica.

Era organizacion aufric era possibilitat de córrer era EXP as runners dera VDA (era corsa cancelada) qu’auien demorat damb eth desir de córrer mès. Uns 200 correires dera VDA decidiren de participar en aquera darrèra corsa que venguec ua bèra reüssida, pr’amor que toti es correires dera VDA que heren era EXP sigueren finishers.

Era sindica d’Aran, presenta ena UTMB

Pendent es autrejaments des prèmis des diferentes espròves, era sindica d’Aran, Maria Vergés, hec acte de preséncia damb un discors en occitan aranés a on anoncièc qu’era Val d’Aran auie estat declarada naua resèrva dera biosfèra pera UNÈSCO, pr'amor “qu’ei un lòc excepcionau pera conservacion dera biodiversitat naturau e dera diuersitat culturau. Conforme un des territòris mès singulars des Pirenèus Orientaus a causa dera sua cultura termierèra, era sua identitat culturau e lingüistica pròpria e era sua diuersitat païsatgistica e ecologica unica.”

Es volontaris, er aute costat der eveniment

Aguest eveniment non solaments engatge correires, tanben atrè centenes de volontaris qu’ajuden ara organizacion des corses; aqueri volontaris an origines diuèrses, quauqui uns son aranesi, mès ua bona part son de diferenti lòcs arreu de Catalonha, der Estat espanhòu e de mès tà delà, coma es que viegen de Lituània o… Singapor!

Es volontaris vengueren atrèti pes meravilhes dera tèrra aranesa o pera motivacion de participar a un eveniment d’un espòrt que cada còp a mès afogadi.

 

 

 

 

 

View this post on Instagram

 

 

 

 

 

 

 

 

 

 

 

A post shared by HOKA Val d’Aran by UTMB (@aranbyutmb)