Malèsser en Roergue pels emplegats de la Pòsta. Après lo suicidi en junh passat d’un agent de la plataforma industriala de corrièr d’Ònes lo Castèl, un agent del centre de triada de Rodés ensagèt de se suicidar la setmana passada.

La FAPT-CGT denoncièt aqueste “nòu drama” dins un comunicat que difondèron diluns passat. Segon lo sindicat, l’òme foguèt victima d’una pression pel sieu cap, çò que suportèt pas e que lo menèt a se dobrir las venas.
 
Al delà, encara segon lo sindicat, çò que se passèt lo 6 d’agost reflectís una situacion que dura “dempuèi de meses”. “Los agents reconeisson que ne pòdon pas pus e testimònian d’aver pas mai los mejans d’assegurar lor trabalh e lo servici public en l’estat.”
 
La prefectura del departament d’Avairon foguèt tanben informada de la situacion.
 
La direccion generala de la Pòsta indiquèt que s’es pres “de mesuras immediatament après los eveniments”. Se tracta d’un “dispositiu d’escota, d’acompanhament e de sosten a disposicion de l’agent e de tota la còla” de la plataforma de distribucion de corrièr de Rodés.
 
Ça que la, la direccion de l’entrepresa a pas dich un mot sus d’eventuals engatjaments, quitament pas per remplaçar l’agent en convalescéncia dempuèi una setmana.