Dissabte passat, una ataca de l’armada israeliana causèt un chaple dins la zòna d’al-Mawaside Khan Yunis, a Gaza. Segon  Le Monde, l’objectiu era l’assassinat de Mohammed Deif, cap militar de l’Hamas, e Rafa Salama, cap de la brigada de Khan Yunis, mas Israèl a pas pogut confirmar lor eliminacion. Ça que la, aquela ataca a causat la mòrt d’almens 90 personas e n’a nafrat 300 autres, segon lo Ministèri de la Santat de Gaza, qu’a denonciat “un massacre odiós contra de ciutadans e de desplaçats”. L’ataca a agut luòc près d’una estacion de distribucion d’aiga e de noiridura, dins una zòna emmuralhada, descricha per la quita armada israeliana coma un refugi pels desplaçats.

Las victimas son estadas transferidas cap a mantun espital de la region. A l’espital kowaitian de Rafah, lo director Suhaib al-Hams, a indicat que la màger part de las nafras èran grèvas, dont d’amputacions.

L’Hamas a acusat Israèl de cercar de dissimular l’amplor del chaple, en ramentant qu’es pas lo primièr còp qu’Israèl afirma aver amirat de dirigents palestinians sens pròva conclusenta. De son caire, lo burèu del primièr ministre israelian, Benjamin Netanyahu, a recordat que la tòca dempuèi la debuta de la guerra èra totjorn estada l’eliminacion dels nauts dirigents de l’Hamas.

L’UNRWA, l’agéncia de las Nacions Unidas pels refugiats palestinians, estima que 1,5 milion de personas se tròban dins aquela region. La setmana passada, quatre escòlas qu’abrigan de desplaçats foguèron tocadas, çò que causèt almens 49 mòrts, segon de fonts localas. Israèl justifica totas aquelas tustadas en afirmant que l’objectiu es totjorn l’eliminacion de “terroristas”.