Aqueste dissabte XIII de julh, la partida entre Dragons e Salford èra plaçada jol signe de la catalanitat: cantaires e musicaires, gigants, jòcs tradicionals, un grop de bailaires per dançar la sardana de la Santa Espina, publicitats per la Plataforma per la llengua e, de segur, Els Segadors.

Dins lo primièr temps, lo mièg de dobertura limosenc Cesar Rougé se metèt en evidéncia : marquèt lo primièr ensag, puèi dos de sos còps de pè de seguir se transformèron en ensages d’Artús Romano. Amb las transformacions de Morgue, los catalans menavan 18-0 a la pausa. Lo segond temps foguèt mens prolific. L’arrièr sang e aur ajustèt una penalitat per confirmar la victòria catalana : 20-0.

Dijòus, Warrington aviá dominat Leeds 30-18. Divendres, Wigan aviá confirmat sa primièra plaça en batent Saint Helens 16-12, e Castleford ganha a Londres 34-20. Dissabte, Leigh èra mai fòrt qu’Huddersfield 20-16 e Hull KR anava batre son vesin Hull FC 24-10.

Aqueste dissabte 20 de julh, los Dagons aniràn desfisar los Tigres de Castleford. Lo club a d’un caire mes a la pòrta tres jogaires que son anats escotar un concèrt en Anglatèrra en plaça d’èsser presents a un entraïnament ! D’autre caire, anóncia lo retorn per una sason d’Eliott Whitehead e la signatura del dobertura dels Roosters Luke Keary.

Un TO en version diesèl

En Championship, los tolosans jogavan a Whitehaven. Manquèron l’entamenada e se trapèron menats 18-0 abans de marcar per tornar a 18-8 a la pausa. Dins lo segond temps, prenguèron la mesura de l’adversari per signar la victòria 34-24.

Dissabte, los occitans reçaupràn los primièrs : Wakefield.

Un tresen State decisiu

Es aqueste dimècres, a miègjorn (a l’ora occitana) a Brisbane que se jogarà lo tresen State of Origine de la sason. Ja fa qualques jorns que demòra pas mai de plaça de crompar. Queensland ganhèt la primièra partida e Nòva Galas del Sud la segonda : quala formacion emportarà la tièra de 2024?

Corona europèa en jòc pels U19

En Serbia, se debana aquesta setmana lo campionat europèu dels U19. Logicament, la finala deuriá opausar franceses e angleses. Als Blaus de confirmar lor victòria de la debuta del mes a Warrington e de tornar al país amb lo trofèu continental.