Lo parlament gambian a rebutat un projècte de lei qu´aviá per mira la despenalizacion de la mutilacion genitala femenina, o excision, practica interdicha dempuèi 2015, après aver refusat cadun dels emendaments al tèxt dins una comission especializada. Lo president del parlament, Fabakary Tombong Jatta, a anonciat après lo vòte que lo projècte presentat pel deputat Almamy Gibba, que sosteniá que la legislacion actuala enfranhiá los dreches constitucionals dels ciutadans a practicar lor cultura e lor religion, èra fin finala estat rebutat.

Aquò interven après que lo projècte de lei  foguèt aprovat en segonda lectura en març, malgrat que lo parlament aja fin finala empachat lo tèxt de passar en una tresena lectura. D´organizacions de defensa dels dreches umans, dont Amnestia Internationala, avián denonciat que lo tèxt prepausat violariá de convencions ratificadas per Gàmbia, demest las qualas la Convencion sus l´Eliminacion de totas las Formas de Discriminacion a Respècte de las Femnas, la Convencion Relativa als Dreches del Mainatge e la Carta Africana dels Dreches e del Benaise del Mainatge.

La directritz regionala d´Amnestia Internationala per l’Africa de l´Oèst e del Centre, Samira Daoud, a saludat lo regèt del projècte de lei e a afirmat qu´èra “essencial” que lo “progrès” representat per la legislacion adoptada en 2015 foguèsse mantengut. “Pasmens, dempuèi l’interdiccion en 2015, solament dos cases d’excisions son estats perseguits e la primièra condemnacion per mutilacion genitala femenina foguèt pas prononciada qu´en agost de l´an passat”, çò a deplorat.

Article tirat e revirat de Vilaweb.