Lo nòu Parlament Europèu se constituiguèt aqueste dimècres passat en metent sus plaça un nòu panorama politic dins l’UE. L’extrèma drecha i a ganhada una preséncia significativa, en representant de quatre parts dels deputats una. Se foguèsson estats amassa, aurián pogut establir un grop parlamentari majoritari amb la capacitat de governar l’UE. Pasmens, e benlèu aürosament per las valors democraticas, lors divisions intèrnas los escampilhan.

Lo grop mai fòrt e mai influent es lo dels Patriòtas per Euròpa, menat per l’autoritari primièr ministre ongrés Viktor Orbán e lo neofaissista francés de l’RN, Jordan Bardella. Aquel grop a exclusa la primièra ministra italiana, Giorgia Meloni, a causa de sa posicion per eles tròp favorabla a OTAN e Ucraïna. Los Patriòtas per Euròpa se son posicionats coma lo grop mai pròche de las politicas dictatorialas ultraconservatrises e imperialistas del Kremlin, amb una influéncia clara de Putin.

Meloni, dempuèi aquel fòrabandiment, a trobat refugi dins lo grop dels Conservators e Reformistas. Aquel grop, format a l’origina pels conservators britanics, amassa ara dempuèi lo Brexit de partits de drecha e d’extrèma drecha, coma novèla aliança al sen del parlament.

Per quant a ela, Alternativa per Alemanha, a causa de sos ligams amb l’ideologia nazi, a vista una rompedura de sas relacions amb d’autres partits, e s’es isolada. A l’ora d’ara, dirigís un tresen grop mendre, que reünís de pichons partits de divèrses païses.

Per mai de detalhs e una analisi completa d’aquel novèl païsatge politic, podètz agachar lo vidèo en catalan de Vicent Partal, cap-redactor de Vilaweb, que trobaretz en seguida.