Actualitats
L’abat Pierre acusat d’agressions sexualas per qualques femnas
Un rapòrt independent mòstra lo testimoniatge de sèt femnas amb qui lo religiós catolic uèi defuntat auriá practicats de contactes fisics non sollicitats
Tèxte legit
Lo dimècres 17 de julhet passat, un rapòrt independent foguèt publicat, incriminant l’abat Pierre, defuntat en 2007 e figura emblematica de l’umanitari catolic, per de faches d’agressions sexualas comeses entre la fin dels ans 1970 e 2005, çò rapòrta Libération. Lo rapòrt, comandat per Emaús Internacional, Emaús França e la Fondacion Abat Pierre, revèla lo testimoniatge de sèt femnas e lança un apèl a d’eventualas autras victimas. “Lo Movement Emaús rend publics de faches que se pòdon aparentar a d'agressions sexualas o de secutament sexual, comeses per l'abat Pierre, entre la fin dels ans 1970 e 2005”, çò ditz lo comunicat presentat per l’associacion.
Segon aquel comunicat, aquelas femnas, demest las qualas de salariadas, de volontàrias e de benevòlas de las organizacions membres del movement Emaús, aital coma de femnas joves de l’entorn personal de l’abat, an raportats de comportaments inapropriats. Lo gabinet Egaé, mandatat per aquela enquista, a destapats de faches de violéncias sexualas, e mai de contactes non sollicitats sus las popas, de proposicions sexualas e de prepauses de connotacion sexuala. Una de las victimas èra menora al moment dels faches presumits.
La publicacion d’aquel rapòrt a provocada una onda de tust dins la glèisa catolica e lo movement Emaús. La Conferéncia dels Evesques de França a exprimida sa “vergonha” e sa “dolor” a respècte d’aquelas denóncias. Michel Laloux, vicepresident de la Conferéncia dels Religioses e Religiosas de França, a soslinhada l’importància de creire e d’escotar aqueles testimoniatges, evocant los degalhs psicologics causats per de talas agressions.
Lo rapòrt conclutz en afirmant qu’es probable que d’autras victimas, non encara identificadas, existiscan. Un dispositiu de crida a testimoniatges es estat mes en plaça per encoratjar aquelas personas a se manifestar e aital permetre una plena reconeissença dels faches.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Quand èrem drollèts nos venián amb un fais d'agiografias. Coma la del paire Foucault, un trucataulièr de la mai o mens nauta que, çò disián, se volguèt rambar de las fèstas e s'anèt far l'ermita a Tamanrasset. Ara que soi grandet, me demandi quina istòria i poguèt aver darrièr l'escotelada que lo tuèt, sachent la aventuras d'autras personas famosas, coma lo Gide, que lor arribava tanben de traversar la Mediterranèa e pas solament per far de conferéncias. O disi per çò que del paire Foucault se'n parla pas pus. O m'engani?
Mas mon brave "Guilhabèrt" ont as vjst qu'òm excusava l'abat de que que sia ? Explicar vòl pas dire excusar ! Un mètge que diagnostica un cancèr es pas en tren de se'n regausir o d'aprobar l'òbra d'aquesta malautia ! Seria mai simple que los òmes de glèisa ajan (coma los pastors protestants, los imams o los rabins) drech a una sexualitat liura puslèu que de dever n'aver una desvianta o clandestina. Vaqui. E s'as besonh de far lo mariòl en fasent mina de creire qu'explicar la genèsi d'un delicte es lo desencusar, es ton prolèma pas lo meu !
Li manquèsse lo sèxe, res non l'empachava pas d'anar consultar qualque professionala, o melhor encara, de se quitar lo fròc per se ne maridar una que l'aguèra amat. Res non excusa pas lo forçar d'una(s) femna(s), ni mai subretot pas la talent sexuala o lo celibat de qui que siá. De preires catolics, n'ai conegut mai d'una qu'aviá companha, e que l'amava respectuosament, non pas vil brau…
Lo problèma màger es aquesta ipocrisia de la Glèisa que manten aquesta absurditat qu'es lo celibat dels prèires. Qu'agrada o pas, la sexualitat d'un èsser uman cal que visca d'un biais o d'un autre. Es coma l'aiga d'un torrent, se l'empachatz rajarà quand mèsma mas amb un fais de degalhs catastrofics.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari