Lo cafè s'encarís. Las causas ne son de marridas culhidas sus tota la planeta a causa dels fenomèns metereologics extrèms coma las secadas e las pluèjas diluvianas que las provòcan El Niño e lo cambiament climatic, çò rapòrta Vilaweb.

Vietnam, lo segond productor màger del Mond, a raportat una davalada de l’11,4% de sas exportacions, amb de perspectivas mai sornas car a l'ora d'ara patís una de sas piègers secadas.

Lo prètz del cafè de varietat robusta atenguèt un recòrd mondial lo 9 de julhet passat, amb 4667 dolars per tona; aquò representa un aument del 63% ongan. Aquela tendéncia inflacionària es estada exacerbada per de conflictes coma lo de la mar Roja, qu'a rendut las vias d'avitalhament dificilas.

A mai, la novèla legislacion de l'UE sus la desforestacion poiriá aver de consequéncias catastroficas pels productors. A partir de decembre, las entrepresas deuràn demostrar que lors produches contribuisson pas a la desforestacion, un enjòc enòrme pels petits païsans dels païses en desvolopament. Lo president de Lavazza, Giuseppe Lavazza, a soslinhat l’impacte d’aquela regulacion e a previst una limitacion màger del mercat e una creissença continua dels prèses. Sembla que l’aument del prètz del cafè es una tendéncia que persistirà.