Ièr dijòus, un incendi estralhèt un immòble de la Carrièra de la Santolina, dins lo quartièr dels Molins de Niça, causant la mòrt de sèt personas, dont quatre mainatges. Segon  Le Monde, las autoritats privilègian la pista criminala e recèrcan activament tres individús. Lo ministre de l’Interior, Gérald Darmanin, e lo primièr ministre, Gabriel Attal, totes dos encara en foncion après la demission oficiala, anèron sus plaça per avalorar la situacion.

L’alèrta foguèt balhada devèrs 2h30 del matin quand los pompièrs foguèron apelats per un incendi al seten solièr de l’immòble. A lor arribada, foguèron confrontats a un fuòc violent. Los socorses realizèron tres salvaments per escala aeriana e metèron en seguretat 33 personas. Una persona grèvament nafrada foguèt transportada a l’espital en “urgéncia absoluda”, mentre que dos autras foguèron espitalizadas en “urgéncia relativa”. En tot, 25 engenhs e 72 pompièrs foguèron mobilizats per mestrejar lo sinistre.

L’incendi auriá debutat dins las partidas comunas del segond solièr abans de se propagar lèu per la colomna seca. Demest las victimas, sièis foguèron retrobadas dins lor apartament, mentre qu’un adolescent de 17 ans se defenestrèt per escapar a las flamas. Los mainatges defuntats avián 5, 7 e 10 ans. Lo bastiment, que data de 1977, foguèt renovat a la debuta dels ans 2000.

Lo cònsol màger de Niça, Christian Estrosi, a exprimit son “immensa emocion” sus la ret X, en anonciant la dobertura d’una cellula de crisi per aculhir las familhas de las victimas. Lo president de la Republica, Emmanuel Macron, a tanben partejat son “esmoguda” e son sosten als niçards.

Aquel drama a trucat los abitants del quartièr, coma Yasmine, que foguèt desvelhada pels crits dels mainatges que demandavan d’ajuda, çò rapòrta Libération. Vegèt l’un dels adolescents a sautar per la fenèstra, aculat pels fums negres. Los pompièrs capitèron a salvar doas pichonas dròllas pendent lor intervencion. La comunautat es en dòl e espèra de responsas mentre que l’enquista se perseguís per determinar las causas exactas de la tragèdia.