La fin de setmana passada, los Dragons Catalans anoncièron:

• Lo retorn sus la pelena de Sam Tomkins qu’aviá arrestada sa carrièra esportiva aprèp la finala fàcia a Wigan en octòbre passat!

• l’arribada tre aqueste dimars del pilar dels Dalfins Jarrod Wallace: 212 partidas jogadas d’NRL (Cavals Fòls, Titans, Dalfins), 6 seleccions amb Queensland

La volontat dels dirigents es de balhar mai de vam als Sang e Aur qu’an un còp de mai conegut la desfaita aqueste dimenge a Castleford 18-24! Novèla sesilha de regantament aqueste dissabte 27 amb la recepcion d’Hull FC a Perpinhan. Una esquipa que ven de ganhar sa tresena partida de la sason en batent Wigan: 24-22!

Decepcion a Belgrad

En Serbia, se debanava la Copa europèa dels U19. En mièja finala, Anglatèrra eliminèt Ucraïna 58-4. Los Blaus dominèron pas tant aisidament qu’aquò los escoceses 30-18.

En finala, las doas esquipas se tenián mas los franceses demorèron embarrats dins un jòc estequit e los tempses de dominacion se revelèron estèrles. A la pausa, los angleses menavan 7-6. Los Blaus ajustèron una penalitat; una autre penalitat tornèt balhar l’avantatge als angleses que confirmèron lor victòria per un ensag sus la còrna 15-8.

Aqueste grop d’U19 prepara una virada en Austràlia per la tardor.

Aquesta fin de setmana, es a Nantas que se tendràn 2 confrontacions anglofrancesas pels U17 (lo 26 e lo 29 de julh).

Lo TO fa pas las causas a mièjas!

En Championship, lo TO recebiá lo cap de fila Wakefield. Los angleses coneguèron lor primièra desfaita de la sason. Larga victòria de la formacion occitana: 32-4!

Novèla recepcion aqueste dissabte 27 amb la venguda de Dewsbury.

Los Blaus de Nòva Galas del sud empòrtan l’edicion de 2024 de l’State of Origine

Aqueste dimècres 17 de julh, lo tresen rescontre a Brisbane èra decisiu per emportar lo trofèu de l’State of Origine. Lo primièr temps valguèt mai que mai per son intensitat defensiva. Queensland prenguèt l’avantatge 2-0 mercé a una penalitat.

A la represa, los Blaus egalizèron, puèi Queensland ajustèt los 2 punts d’una novèla penalitat. Los Blaus faguèron la diferéncia en marcant dos ensages 14-4.

Tre divendres, lo campionat NRL tornava prene sos dreits:

• Melbourne confirma sa posicion de primadièr en dominant los Polets 24-8

• una victòria al defòra: los Cavals fòls a Newcastle 30-14

• de victòrias aisidas: dels Lapinons fàcia als Tigres 42-28 e de Manly fàcia als Titans 38-8

• tres partidas mai sarradas amb las victòrias de Canberra (20-18 fàcia als neozelandeses), de las Pantèras (28-26 fàcia als Dalfins) e dels Vaquièrs (20-18 fàcia als Dògols).