capçalera biera tobiers

Actualitats

EnvironamentPoliticaSocietat

Lo militant ecologista Paul Watson dins los filats de la justícia

Foguèt interpelat dimenge a Nuuk, la capitala de Groenlàndia, mentre qu’èra en escala per far lo plen de son vaissèl

Annadit de 73 ans e paire de tres enfants, Paul Watson risca desenant l’extradicion cap a Japon, un dels darrièrs païses que practican encara la caça de la balena malgrat son enebicion en Antartida
Annadit de 73 ans e paire de tres enfants, Paul Watson risca desenant l’extradicion cap a Japon, un dels darrièrs païses que practican encara la caça de la balena malgrat son enebicion en Antartida | guano

Tèxte legit

Fondador de l’ONG Sea Shepherd (Pastre de la Mar), Paul Watson es estat arrestat per las autoritats danesas,  segon las informacions transmesas per l’antena francesa de l’organizacion de defensa dels oceans. Lo capitani e son esquipatge èran en mission per “contrar” lo Kangei Maru, un vaissèl japonés qu’es lo mai grand balenièr jamai bastit.

Paul Watson foguèt interpelat dimenge 21 de julhet per aver navigat dins las aigas de las illas Feròe dins l’encastre de l’operacion “Bloody Fjords” (fiòrds sagnoses) en 2023 qu’aviá per mira de luchar contra “lo massacre” de cetacèus dins l’archipèla. Son arrestacion s’explica tanben per sa preséncia sus una notícia roja d’Interpòl mesa en plaça en 2012 en seguida d’un òrdre de detencion lançat per Japon.

 

Risca l’extradicion cap a Japon

 

“Après èsser estada mesa en linha pendent d’annadas, la notícia aviá recentament desaparegut del sit internet d’Interpòl, daissant creire a Paul Watson e sos avocats qu’èra d’ara enlà liure de sos movements”, çò a denonciat Sea Shepherd sus X. Dempuèi 2012, Paul Watson aviá viatjat liurament, en França, en Soïssa, als Païses Basses o en Irlanda.

“Totes aqueles païses an decidit d’ignorar aquela notícia roja vergonhabla utilizada coma esplech politic per Japon qu’a per tòca d’acorsar e de punir Paul Watson per s’èsser opausat a la caça balenaira illegala antartica, çò escriguèt Sea Shepherd. Mas Danemarc n’a decidit autrament. Se renga, un còp mai, del costat de las nacions pendardas que viòlan las leis e los tractats de proteccion dels mamifèrs marins”.

Annadit de 73 ans e paire de tres enfants, Paul Watson risca desenant l’extradicion cap a Japon, un dels darrièrs païses que practican encara la caça de la balena malgrat son enebicion en Antartida.

 

 

 

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article