Carles Puigdemont, president de la Generalitat de Catalonha en exili, a reïterat son engatjament a tornar en Catalonha pel debat d’investidura, malgrat lo risc d’empresonament, çò rapòrta Vilaweb. Aquel engatjament ja èra estat pres pendent la campanha electorala de las eleccions catalanas del 12 de mai passat, mas pendent una amassada dissabte a Banys i Palaldà (Catalonha Nòrd) per celebrar lo quatren anniversari de la fondacion de son partit centrista Junts (Ensems), lo cap independentista declarèt que sa responsabilitat èra d’èsser present al Parlament pel debat d’investidura, “cossí que vire”. Aquela declaracion interven mentre que las negociacions entre los independentistas pragmatics de centresquèrra d’ÈRC e los leialistas espanhòls del PSC per l’investidura del socialista Salvador Illa son encara en cors.

Puigdemont soslinhèt que son arrestacion seriá “illegala”, en assolidant que la Cort Suprèma d’Espanha respectava pas la lei d’amnestia adoptada en seguida de la crisi politica provocada pels eveniments del Primièr d’Octòbre de 2017. Qualifiquèt l’actitud del la Cort Suprèma de “còp d’estat”, en ajustant que son retorn metriá en lum los mancaments de l’estat espanhòl. “Nos devèm defendre contra aquela ‘Tòga Nòstra’ que lo contraròtla lo PP per la pòrta amagada”, çò assegurèt en criticant tanben lo silenci del PSÒE davant las decisions de la Cort Suprèma.

Malgrat las preocupacions de son entorn pertocant los risques d’empresonament, Puigdemont demòra determinat a tornar. Considèra aquel gèst coma un acte politic destinat a “decelar” l’estat espanhòl. “La preson que nos en cal sortir es Espanha”, çò apondèt en cridant a la mobilizacion de sos partisans.

Dempuèi la nuèch de las eleccions, Junts a temptat de badas d’obténer lo sosten d'ÈRC per investir Puigdemont e empachar l’eleccion de Salvador Illa. E mai aquela entrepresa semble malaisida, Junts s’es engatjat a far tot son possible per empachar Illa de venir president de Catalonha. “Jogam nòstre avenidor coma nacion. S'Illa ven president, deurem oblidar l'idèa d'un estat pròpi perque i aurà un procès de desnacionalizacion”, çò declarèt tanben lo secretari general del partit Jordi Turull. De son costat, Laura Borràs, presidenta de Junts, insistiguèt sus la necessitat d’unir las fòrças amb la CUP (esquèrra radicala independentista) e ÈRC.

L’engatjament de Puigdemont de tornar pel debat d’investidura plaça ÈRC dins una posicion delicada: sosténer lo pache amb lo PSC e riscar l’arrestacion de Puigdemont, o trobar una alternativa. Aquela situacion poiriá relançar la mobilizacion independentista e ajustar una jaça novèla de tension a la politica catalana. Cal apondre que tot acòrdi al qual arribariá ÈRC amb lo PSC per investir lo candidat socialista deurà èsser aprovat pels militants del partit, e es pas tampauc evident que ne sián d'acòrdi.

L’Assemblada Nacionala catalana (ANC) a ja promés de defendre Puigdemont, e aqueste espèra que son retorn enflamarà tornarmai lo movement independentista. “Devèm acabar nòstre prètzfach”, çò concluguèt davant un public de 1500 personas. Mentre que d'unes consideravan amb scepticisme sa promessa de retorn coma una estrategia electorala, Puigdemont a ara avançat d’una casa.

El MHP @krls tornarà al Palau del @parlamentcat si hi ha un debat d’investidura.

Espero rebre’l amb la dignitat que correspon a aquell que ha servat la Presidència de Catalunya a l’exili. I amb la seguretat garantida en seu parlamentària. pic.twitter.com/S7dqIKh63T

— Josep Rull i Andreu (@joseprull) July 27, 2024

Dedicat als qui desitjaven veure’l rendit o dubtós. Aquí el teniu. Fermesa i determinació en estat pur. Jo també hi seré, President @KRLS. I estic convençut que serem molts. A totes, per defensar-te a tu i per defensar la llibertat del nostre País. Estem preparats! 💪 pic.twitter.com/Pq7he5ydHN

— Salvador Vergés i… Tejero! (@vadorverges) July 27, 2024