Aqueste dissabte 27 de julh, a Perpinhan, la partida dels Dragons fàcia a Hull FC foguèt pas de tot repaus. Èra lo retorn de Sam Tomkins jol malhòt catalan.Lo davant australian Wallace foguèt convidat de jogar sa primièra partida a Brutus tre son arribada dels antipòdes. Mc Ilorum se nafrèt al cap de qualques minutas, puèi foguèt al torn de Mathieu Laguerre de daissar sos companhs. Per placatge naut, Tariq Sims prenguèt un roge, equilibrat qualques minutas mai tard per un roge del costat anglés!

McIlorum aviá marcat lo primièr ensag tre la 3a minuta (transformacion de Morgue), egalizacion anglesa dètz minutas mai tard. Puèi Sam Tomkins marcava un ensag per son retorn. Amb la novèla transformation, puèi una penalitat de Morgue, los Sang e Aur menavan 14-6 a la pausa.

Hull marcava tre la represa, mas los catalans ajustavan dos ensages pel capitani Garcia e l’alièr Davies per se metre fòra de portada dels vesitaires que clavavan la marca per un ensag. Victòria catalana 24-16 que plaça los Dragons en quatrena posicion al classement.

Doblan una formacion de Saint Helens dominada a Leigh 46-4. Warrington pren lo cap de classament en ganhant a Wigan 40-4.

Lo mes d’agost serà anglés pels catalans qu’aniràn rescontrar Londres aqueste dissabte 3, puèi Huddersfield (divendres 9), Hull KR per la Dimenjada Magica (dimenge 18) e Leeds (divendres 23) abans de reçaupre Wigan lo dissabte 31!

Passejada tolosana

En Championship, Tolosa recebiá los darrièrs de la competicion: Dewsbury. Los occitans s’impausèron aisidament: 58-6. Aqueste dissabte 3, la victòria es de considerar pels Blau e Blanc a Swinton.

Polida victòria dels U17

La formacion francesa dels U17 rescontrava los angleses a Nantas aqueste divendres 26 de julh. S’impausèron largament sens encaissar un punt: 40-0.

Segonda confrontacion, tornarmai a Nantas, aqueste diluns 29.

NRL: Melbourne e Penrith menan la dança

En cap de classement del campionat australian, Melbourne e Pentith confirman lor predominància e pòdon ja pensar a un primièr torn de las pelhòfas a domicili. Melbourne ganha a Parramata 32-14 e Penrith s’impausa cò dels Dragons de Sant Jòrdi: 46-10.

Copas del Mond de 2026 en Austràlia e Papoa-Nòva Guinèa

La federacion internacionala a confirmat que las Copas del Mond de 2026 se tendrián en Austràlia e Papoa-Nòva Guinèa.

Cò dels òmes, 10 formacions participaràn a la competicion. Los uèit quarts de finalista de 2022 son qualificats d’ofici. França se deurà ganhar la plaça tre octòbre amb una competicion que veirà las oposicions França-Ucraïna e Galas-Serbia lo dimars 22 a Carcassona. Los venceires se traparàn lo dissabte 26 a Perpinhan per designar lo participant al rendètz-vos mondial. La darrièra plaça se jogarà dins un torneg entre Jamaica, Africa del sud e las illas Cook.

8 formacions prendràn part a la competicion mondiala. Las francesas son qualificadas aprèp las partidas ganhadas contra Grècia e Serbia. Uèit formacions tanben se disputaràn la corona planetària de XIII-cadieral.