Pel 37n còp, de centenats d’occitans e catalans s’amassan uèi al pòrt de Salau, a la termièra occitanocatalana, a 2100 mètres d’altitud. Los participants puèjan del costat occitan de Salau estant (Coseran), en tot marchar doas oras e mièja, e del costat catalan d’Esterri d’Àneu estant (Palhars Sobeiran) en tot caminar aperaquí 45 minutas. L’amassada es organizada pel CAÒC e per l’ASPIC, coma una randolejada d’amistat e de revendicacion nacionala dels dos pòbles vesins.

Un còp al pòrt, i fan d’actes d’afrairament amb un escambi de produches dels dos costats, De costuma, los occitans i pòrtan lo formatge del temps que los catalans i venon amb lo vin, mas tanben s’i escàmbia de liquors amb de ratafiat, de galetas, de chocolat o de carnsalada. Tanben s’i fa de danças tradicionalas al son dels musicians pirenencs, occitans e catalans. A mai, an luòc, coma tostemps, los discorses de benvenguda, las cançons e los imnes mentre que son issadas las doas bandièras.

L’emplaçament d’aquel pòrt es simbolic: es un passatge natural entre Occitània e Catalonha qu’a servit istoricament per far de comèrci e per connectar los dos pòbles. Pendent la Guèrra d’Espanha, de milièrs de republicans i passèron sul camin de l’exili.

En mai d’aquò, ongan los participants a la Pojada poiràn concórrer a la 1a edicion d’un concors de fòtos. Ne podètz consultar lo reglament aicí.