Lo jornalista Pablo González es estat liberat après dos ans e cinc meses de preson en Polonha, çò rapòrta VilaWeb. Lo jornalista basco, qu’a lo doble ciutadanatge espanhòl e rus, foguèt acusat d’èsser un espion rus del temps que raportava l’arribada de refugiats ucraïneses. Foguèt arrestat lo 28 de febrièr de 2022 e encarcerat en confinament solitari. L’an pas jamai jutjat ni jamai presentat de pròvas de las acusacions.

González es estat menat en Russia. Sa familha es reconeissenta del sosten recebut, mai que mai de l’associacion #FreePabloGonzalez.

La liberacion se faguèt dijòus dins un escambi de presonièrs entre Russia e los Estats Units jos la mediacion de Turquia. Demest los liberats per Russia i a Evan Gershkovitch, un jornalista de The Wall Street Journal, acusat d’espionatge per Russia; lo soldat estatsunidenc Paul Whelan, lo ciutadan britanicorus e critic del Kremlin Vladimir Kara-Murza, e lo mercenari alemand Rico Krieger.

De l’autre cant an liberat de presonièrs de l’Union Europèa e dels Estats Units. Del caire europèu, en mai de González, an liberat l’agent de l’intelligéncia russa Vadim Krasikov, condemnat per assassinat d’un ancian comandant chechèn; l’agent Mikhaïl Mikushin, arrestat en Norvègia; lo parelh Artem Dutsev e Anna Dultseva, oficièrs de naut rang dels servicis secrets russes detenguts en Eslovènia per espionatge. Del costat estatsunidenc son liberats Roman Seleznev, pirata informatic; Vladislav Klyushinel, proprietari d’una entrepresa de tecnologia de l’informacion, e Vadim Konoshchenok, qu’auriá provesit Russia de tecnologia e de municions desvolopadas als Estats Units.

Un jornalista basco examinat per l’intelligéncia espanhòla

Pablo González estudièt la filologia eslava e parla rus e polonés. Tot aquò lo menèt a venir jornalista freelance especializat en l’espaci pòstsovietic e a raportar sus plaça los eveniments mai importants de las darrièras annadas coma las protèstas d’Ucraïna de 2014 —que s’acabèron amb un cambiament de govèrn— e l’annexion russa de Crimèa.

Lo 5 de febrièr de 2022, González se trobava a Avdiivka, en Donetzk. Aviá pachat de far una connexion en dirècte per una television espanhòla, La Sexta, per fin d’assabentar de la vida de la populacion civila a un moment que ja se crenhiá una possibla invasion russa d’Ucraïna. Coma o expliquèt Juan Teixeira, un fotojornalista qu’èra amb el, volguèron far la connexion en dirècte, mas èran susvelhats per de militars. Mas après esperar 45 minutas sens reüssir a se connectar, los militars ucraïneses cancelèron la connexion e lor faguèron escafar lo material enregistrat pendent aquel moment. Puèi prenguèron una fòto del passapòrt de González. Aquela meteissa nuèch, recebèt una telefonada dels servicis secrets ucraïneses que li demandèron de se presentar a Kyiiv al pus lèu possible. E i anèt sul pic.

Abans d’intrar en çò dels servicis secrets, González diguèt a sos collègas que, en cas que foguèsse retengut mai de doas oras, publiquèsson un messatge suls rets socials per o anonciar. Eles o faguèron. 40 minutas apuèi, poguèt sortir e publiquèt sus Twitter qu’avián copiat l’informacion que i aviá dins son telefòn mobil. Pus tard, expliquèt que l’avián acusat d’èsser un espion rus amb d’arguments rocambolesques coma lo fach d’aver collaborat amb lo jornal basco Gara o d’aver una carta bancària de Laboral Kutxa, una banca cooperativa basca que, segon los servicis ucraïneses, seriá finançada per Russia. Mentretant, d’agents de l’intelligéncia espanhòla (CNI) èran al domicili del jornalista en Bascoat, e tanben en Catalonha, per interrogar sa familha e sos amics pròches. Per tant, González decidiguèt de tornar en Bascoat.

El periodista Pablo González queda libre tras dos años y medio sin pruebas en contra ni juicio. Más allá del contexto, estamos ante una excelente noticia: ningún periodista puede ser encarcelado sin un proceso justo.

El periodismo no es delito,#FreePablo. pic.twitter.com/89Y4sHaHkY

— EH Bildu (@ehbildu) August 1, 2024