Pokrovsk, Ucraïna. Las fòrças rusas an lançat una ataca intensa dins la region del Donbass oriental en Ucraïna e an avançat en plena calor estivenca per espandir los ganhs territorials de Moscòu e capturar la vila de Pokrovsk, un nos de transit clau dins la region, ço rapòrta The Washington Post.

L’ofensiva se debana mentre qu’Ucraïna patís una penúria importanta de soldats e que la turbuléncia electorala als Estats Units a aviat de novèlas especulacions segon las qualas Kyiv poiriá lèu èsser obligada de negociar.

Après l’ajuda recebuda en mai per Ucraïna per rebutar una novèla invasion de la region de Kharkiv, jos forma d’una avalanca de fonzes e de sosten militar, qu’a avalit los espèrs de Moscòu d’encerclar la segonda pus granda vila d’Ucraïna, los comandants russes an d’ara enlà reorientat lor atencion cap a la region de Donetsk, l’objectiu territorial principal del president rus, Vladimir Putin.

La reïnvasion de la region de Kharkiv, malgrat sa malescasuda, a desviat las ressorsas ucraïnesas. Oleksandr, trenta ans, comandant de batalhon de la quaranta setena brigada, que combat près d’Ocheretyne, ditz que l’estrategia russa es intelligenta: “Ensajas de concentrar la fòrça de ton enemic dins una direccion puèi lo distrases dins una autra.”

“Lor primièr objectiu es de nos destruire”, çò ditz. “Lo segond es de nos metre jos pression per aver mai d’influéncia dins las negociacions de patz e obténer mai de concessions. Son quasi a mand de capturar la region de Donetsk.”

Las tropas de Putin avançan ara en arc amb tres ponches clau: Chassiv Iar, just a l’oèst de la vila de Bakhmot, que Russia capturèt a la prima de 2023; la vilòta industriala de Toretsk; e dins las zonas ruralas a l’oèst d’Ocheretyne, un vilatge sus un replanat estrategic capturat en mai après l’avança de las fòrças russas al nòrd-oèst en provenença d’Avdiivka, qu’ocupèron en febrièr.

E mai i aja de combats intenses endacòm mai, l’ofensiva a Donetsk representa un cambiament notable dins las tacticas dels comandants russes, que semblan d’aver aprés de las errors passadas e realizan ara de ganhs constants pel Kremlin.

La setmana passada, l’Institut per l’Estudi de la Guèrra (ISW), un think tank basat a Washington, raportèt qu’Ucraïna aviá empachat una granda ataca mecanizada de las fòrças russas près de Kostiantynivka. Divendres, l’Estat Major General d’Ucraïna assabentèt que lo ponch mai “caud” demorava près de Pokrovsk.

“Aquel vam novèl dins la region de Donetsk es plan interessant, perque indica un cambiament mai larg dins la planificacion operacionala”, segon Karolina Hird, analista a l’ISW.

“Après aver sacrificat d’òmes dins d’esfòrces perlongats e de fòrtas pèrdas –çò ditz– los comandants operacionals russes aprenon ara a menar d’esfòrces ofensius simultanèus e mutualament afortits e a manténer una pression constanta sus las ressorsas ucraïnesas.”

Las fòrças ucraïnesas, aganidas, ressenton la pression, agreujada per la calor estofanta de l’estiu, amb de temperaturas que despassan los 40 grases dins cèrtas zònas del front aqueste mes.

Los comandants e soldats ucraïneses interrogats per The Washington Post mençonan l’aganiment e la diminucion de las ressorsas, e mai una grèva penúria de tropas. Una novèla lei de mobilizacion adoptada pel parlament ucraïnés a pas encara fornit las ajudas necessàrias, perque las novèlas recrutas son encara en formacion e cèrts òmes eligibles al servici an fugit lo país o s’amagan en çò lor per evitar la conscripcion forçada.

Un sergent de cinquanta sièis ans, qu’utiliza lo nom de còde Bart, a descrich la situacion coma “critica” e a declarat que i a “un caos seriós” sus las linhas de front.

Mikhaïl, de quaranta sièis ans, comandant d’una batariá de mortièrs que combat a Krasnohorivka, e fa servir lo chafre Brain, a declarat que Russia aviá intensificat la pression a l’entorn d’Ocheretyne e desplegat de ressorsas importantas, e mai de tropas e de tancs.

Fa mai d’una setmana, las fòrças russas capitèron a avançar de quatre milas a l’oèst d’Ocheretyne e forcèron lo retirament d’una brigada d’infantariá ucraïnesa que defendiá lo front dins lo vilatge de Prohres. La quaranta setena brigada mecanizada d’Ucraïna es estada obligada a una “retirada caotica” a causa de la manca de soldats.

D’unes dels combats mai intenses de l’estiu se debanan a l’ora d’ara a l’entorn de la vila industriala de Toretsk, ont Russia a realizat de ganhs tactics significatius.

Los comandants e analistas militars dison que l’objectiu d’aqueles combats, e dels assauts russes sus la vila vesina de Niu-York, es de far pression sus las unitats d’infantariá aganidas d’Ucraïna, amb la tòca d’aténher Kostiantynivka.

Los soldats ucraïneses afirman que las fòrças russas près de Toretsk semblan d’utilizar la meteissa estrategia qu’aquela emplegada per capturar Avdiivka en febrièr après de meses de combats intenses. Aquí, los russes an encerclat los ucraïneses per tres costats, tot en los aganissent simultanèament amb de bombardaments incessants de bombas planairas.

Ara, en mai dels bombardaments e de las atacas de drònes, la calor extrèma aganís los soldats que vivon dins las trencadas dels bòsques e dels camps dobèrts d’Ucraïna.

Cèrtas fòrças russas se desplaçan tanben cap a l’oèst e lo nòrd per la vila de Kurakhove. Se capturan Toretsk, Pokrovsk e Kostiantynivka, tota la region de Donetsk serà en dangièr.

Mantun comandant ucraïnés mençona l’acceleracion de la guèrra dels drònes coma un dels principals desfises sul prat batalhièr e assolida que Russia a considerablament melhorat sas capacitats de blocatge electronic per eliminar l’avantatge d’Ucraïna dins l’utilizacion d’aquelas aisinas.

“Çò qu’a fòrça cambiat, son las tacticas de drònes e l’utilizacion de la guèrra electronica. Abans, aviam l’avantatge e èrem mai eficaces, mas es pas pus lo cas”, çò declarava Mikhaïl.

Serhii, de vint e nòu ans, comandant d’una unitat de drònes que trabalha a Niu-York e emplega l’escais Shelby, ditz qu’Ucraïna torna tanben dessenhar de drònes per desminar e menar de novèls tipes d’assauts. Per exemple, çò ditz, los engenhaires an installat de minas anticarris sus de drònes Kazhan de granda endurança.

De nombroses veïculs dins lo Donbass son ara esquipats d’antenas, indicant que transpòrtan d’esquipaments de blocatge de drònes. Los soldats fan tanplan servir de pichonas boitas negras conegudas amb lo nom de “sucre”, de radars qu’identifican e alèrtan de la preséncia de drònes. Los sucres existissián pas en Ucraïna fa un an, mas son ara plan corrents.

Los soldats ucraïneses an tanben notat un aument de l’emplec de bombas aerianas, en particular de bombas planairas de l’èra sovietica, a l’entorn de Chassiv Yar e de Niu-York, que, segon eles, causan de damatges significatius e sapan lo moral. D’unas pesan près de tres mila quilos e pòdon destruire de posicions d’infantariá e de bastiments amb un efièch catastrofic.

Eugeni, de quaranta un ans, un pilòt de drònes que trabalha a Niu-York, ditz que malgrat que los comandants russes s’apiègen totjorn sul mandadís d’èrsas de recrutas recentament integradas e sovent mal preparadas per un objectiu, aplican ara tanben de novèlas tacticas de “tèrra cremada” per destruire completament de vilas entièras.

“Los russes atacan Niu-York amb de bombas aerianas e de l’artilhariá per destruire completament de quartièrs entièrs de la vila per tal d’i poder desplaçar de tropas”, çò assegura Serhii, lo comandant dels drònes.

Pasha, de trenta quatre ans, comandant de drònes que combatamb la cent cinquena brigada, descriu la situacion a Niu-York coma “plan dificila”. “Utilizan Niu-York per encerclar Toretsk, e pensi qu’an ara una reala possibilitat de l’encerclar, es pas qu’una question de ressorsas e de temps”, çò ditz. Las bombas planairas son tan poderosas que pòdon paralisar d’unitats d’infantariá entièras.

Pasmens, Hird, de l’Institut per l’Estudi de la Guèrra, ditz qu’es pauc probable que Russia capite ben malgrat las recentas victòrias. “Russia a pas demostrat que podiá menar d’avançadas mecanizadas eficaças e prene de vastas espandidas de territòri, donc es pauc probable que pòsca prene tot Donbass per la fòrça”, çò declara. Pasmens, un conflicte lent e aganidor es mai avantatjós per Moscòu mentre que lo moral ucraïnés declina e que l’avenidor del sosten occidental es remés en question.

Article tirat e revirat de Vilaweb.