La sason toristica a París decep, malgrat l’estiu e las nautas espèras del sector ostalièr pels Jòcs Olimpics. Segon laCorporacion Catalana dels Mèdias Audiovisuals, luènh d’atraire los vesitaires, l’eveniment sembla de los aver malcorats, en partida a causa d’una creissença dels prèses del 200 % en mejana, empenhentfòrça toristas a causir d’autras destinacions.

Mariluz Castro, proprietària d’un agradiu apartament toristic dins lo quartièr dels Tèrnes, près de l’Arc de Trionf, testimònia d’aquela situacion. Son lotjament de 43 mètres cairats, un còp èra logat a 500 èuros per nuèch, a vist sas tarifas a tombar a 350 èuros a la prima a causa de la manca de clientèla. Malgrat la debuta dels Jòcs, sos primièrs clients arribaràn pas que la setmana venenta.

“L’ai logat solament quatre nuèches a de coneguts. Las gents semblan d’èsser venguts fòlas amb los prèses, çò qu’a fòrça frenat los toristas”, çò explica.

Malgrat que i aja pas encara d’estatisticas oficialas, mantuna ostalariá parisenca admet d’èsser pas emplenada qu’a mièjas. Guillaume Rumiel, gerent de l’ostalariá del Vieux Marais, a proximitat del Centre Pompidor, parla de “catastròfa”. Segon el, los vesitaires preferisson las locacions Airbnb, mai abordablas, puslèu que las cambras d’ostalariá.

“Es una catastròfa perque ai un molon de cambras voidas”, çò deplora.

Lo sentiment general es que i a tròp d’ofèrta per una demanda qu’a pas seguit. Frank Delvau, president de l’Union dels Mestièrs e de las Indústrias de l’Ostalariá (UMIH) de la region parisenca, espèra que los toristas tornaràn après los Jòcs. “Un torista non interessat pels Jòcs Olimpics s’es dich: ‘I anarai après los Jòcs, mas pas ara’.”

Malgrat las dificultats, los ostalièrs esperavan de far lo plen pendent aquesta nauta sason que coïncidís amb los Jòcs. En comparant la situacion amb Pequin 2008 e Londres 2012, ont las ostalariás èran plenas malgrat de prèses triplats, veson dins aqueles Jòcs Olimpics una malescaduda retronanta.