Aquesta debuta d’agost foguèt pas favorabla als primadièrs de Superliga e d’NRL.

Los Lops de Warrington an perdut sus lor pelena e pas sonque un pauc: 4-22 fàcia a Hull KR. Pel primièr còp dempuèi 25 ans, los Dragons de Sant Jòrdi-Illawara son anats batre la Tempèsta a Melbourne 18-16.

Los Dragons a l’arrèst

Aprèp lo retorn de Sam Tomkins e la signatura del pilar Wallace, los Dragons fan venir per acabar la sason lo centre de Melbourne Reimis Smith. Fan tanben signar un contracte professional al prometeire jove centre de Lesinhan Clamenç Martin.

Aqueste dimenge, a Londres, la premsa locala confisava de faire lo plen de fisança fàcia als darrièrs. Levat que los Sang e Aur joguèron sens èime, sens vam e sens cap d’animacion ofensiva un rugbi sens ambicion. Fin finala, Londres signèt sa segonda victòria de la sason 12-10. I a quicòm que truca al pè del Castillet!

Los jogaires catalans s’installan aquesta setmana del costat de Leeds abans de rescontrar Huddersfield divendres de ser.

Leigh (20-10 a Castleford) e Saint Helens (46-6 a Hull FC) ganhan en desplaçament.Wigan repren sa marcha endavant (28-14 fàcia a Huddersfield) e Salford manten Leeds en 7a posicion (22-16) a 4 punts de la qualificacion per las pelhòfas.

NRL: Perth demanda de XIII

Dins una partida deslocalizada a Perth, los Polets an batut los Dalfins: 40-34. Ganhan al defòra: los Vaquièrs cò dels Tigres 48-30 e Parramatta en Nòva Zelanda 30-20. A domicili, los Titans baton Brisbane 46-18 e Cronulla domina los Lapinons : 20-6.

Dimenge, al tèrme de partidas disputadas, Penrith bat Newcastle 22-14 e los Dògols se desfàn de Canberra 22-18.

Felicitacions…

.. als Blaus U17 qu’an emportadas, a Nantas, las doas partidas fàcia als angleses: 40-0 e 42-8.