Pendent las 42as Jornadas Internacionalas de Corti, en Corsega, lo 4 d’agost passat, lo nòu partit independentista, Nazione, anoncièt son projècte d’inclure l’illa dins la lista dels territòris non autonòms de las Nacions Unidas. Aquela lista, tanben coneguda coma la lista dels territòris de descolonizar, es consagrada dins lo capítol XI de la Carta de l’ÒNU e compren actualament 17 territòris, dont la Polinesia Francesa e Canaquia.

Petr’Antò Tomasi, pòrtavotz de Nazione, expliquèt qu’aquel apròchi a per tòca de “crear un rapòrt de fòrça” en s’apiejant sus la comunautat e lo drech internacionals. E mai aquela inscripcion aguèsse pas cap d’efièch constrenhent sus París, simbolizariá una remembrança a França de “son estatut degradant de poténcia coloniala”.

Tot dependrà de l’Assemblada de Corsega, qu’o poiriá decidir en fin de setembre a l’iniciativa de Nazione, segon Corsenet Infos. Una demanda a l’ÒNU de l'assemblada deliberativa insulara legitimariá politicament l’apròchi, coma o mostrèt l’exemple polinesian. Per convéncer lo pòble còrs e los elegits, Nazione vòl demostrar que l’inclusion de Corsega sus la lista de l’ÒNU dels territòris non autonòms es un pas clau per la reconeissença internacionala dels dreches del pòble còrs e per metre fin als dialògs esterils amb París, mentre que la negociacion d’una eventuala autonomia es suspenduda dempuèi la crisi politica francesa.