Comence aué en Salardú (Pujòlo) eth hestivau Sons dera Garona. Aquera hèsta culturau s’estierà enquia dimenge que ven e compdarà damb ua tièra d’activitats que meteràn en valor era cultura occitana de tot eth nòste país gran.

Entre es concèrts mès importanti i a La Talvera, ua formacion qu’a realizat un important prètzhèt de recèrca sus patrimòni etnomusicau occitan, en tot hèr-lo accessible ath public a trauès des sues publicacions, balhs e concèrts. Totun, era sua musica presente ua cultura viua e ua fusion d’elements tradicionaus e contemporanèus d’Occitània e de tot eth Mon.

Tanben cau remercar era preséncia de Castanha e Vinovèl, un duet de musicians de Besièrs creat er an 2007 que recupère cançons e melodies de balh deth repertòri tradicionau occitan. Abans deth sòn concèrt, aufriràn un talhèr entà apréner dances tradicionaus occitanes.

D’autes activitats includissen un talhèr d’istòria sus bruishonades e proteccions contra eth mau temps a cargue de Musèus dera Val d’Aran, ua conferéncia de Tònho Peremartí sus Mossen Condò en Pujòlo, era projeccion deth documentau VerdMadur damb era preséncia dera arrèhilha der escrivan deth roman, un mercat artesanau, jòcs de quilhes, e un talhèr de cançon improvisada occitana e glòsa catalana damb recitau de Carles Belda e Ferriol Macip.

Aguest hestivau ei ua escadença unica entà gaudir d’ua rica prepausa d’activitats culturaus e musicaus, totes eres orientades a promòir e hèr a víuer eth nòste eretatge culturau.