capçalera campanha

Actualitats

InternacionalPolitica

Puigdemont torna aparéisser a Barcelona e desapareis après un discors esmovent

“Sèm encara aicí!”, çò a dich lo president catalan en exili dempuèi 7 ans. Puèi a desaparegut mentre que la polícia lo cèrca dins un dispositiu digne d’un criminal perilhós

Carles Puigdemont es aparegut aqueste dijòus 8 d’agost a 9h a Barcelona. Lo president de la Generalitat de Catalonha en exili dempuèi 7 ans a fach una brèva aparicion davant de desenas de milièrs de personas que s’èran amassadas per l’aculhir.  “Sèm encara aicí!”, çò a dich Puigdemont. “Sabi pas quant de temps caldrà abans que nos tornem veire, mas quand o farem, espèri que poirem tornar cridar amassa: «Visca Catalonha liura!»”. La molonada esmoguda a respondut en cridant “president, president!”.

Après lo discors, Puigdemont se n’es anat amb sos seguidors devèrs lo Parlament, ont se ten lo vòte d’investidura del socialista Salvador Illa coma nòu president de la Generalitat. E mai aguèsse anonciat son intencion d’i participar, Puigdemont es pas arribat pas a l’assemblada legislativa catalana. Segon qualques rapòrts locals, auriá fugit dins un veïcul blanc, çò qu’a provocat una operacion policièra exagerada per lo trobar, coma se foguèsse un criminal perilhós. Es important de notar que, e mai i aja una lei d’amnestia en vigor pels independentistas catalans dins l’estat espanhòl, lo jutge Pablo Llarena refusa de l’aplicar. Per tant, e mai la detencion de Puigdemont siá probablament illegala, la polícia lo cèrca de contunh per l’arrestar.

De fach, la polícia catalana e tanplan los còrses de l’estat, an desplegat un dispositiu extensiu per localizar e arrestar Puigdemont, en anant fins a arrestar un policièr catalan sospechat d’aver ajudat lo cap independentista a s’escapar. Catalonha entièra es estada  blocada pendent tota la jornada per l’operacion fins al ponch que l’a calgut interrompre a qualques moments.

Segon divèrsas sorsas, Puigdemont se seriá exiliat tornarmai e se trobariá en seguretat, luènh de la polícia espanhòla. Dins los jorns avenidors s’adreiçariá a sos ciutadans.

Mentretant, al Parlament, l’abséncia de Puigdemont es estada un ponch de tension entre los divèrses partits catalanistas e espanholistas. 

 

Salvador Illa investit nòu president de la Generalitat

 

Lo socialista Salvador Illa es estat investit nòu president de la Generalitat de Catalonha amb 68 vòtes favorables e 66 contra. Sul pic, la sindica d’Aran, Maria Vergés, del meteis partit, se n’es regaudida sul ret social X. “Felicitats d'Aran ençà —çò a dich— Auem per endauant fòrça trabalh tà melhorar era vida des aranesi e de toti es catalans!”

L’eleccion s'es facha amb los vòtes del partit independentista moderat ÈRC, qu'a mantengut son sosten a Illa e a refusat de s’associar a la demanda de Junts d'una suspension de l’investidura, malgrat la caça a Puigdemont,  pasmens cap de l'oposicion.

 

 

 

 

 

 

 

 

 

 

 

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Pitèas
1.

Robin Hood vs. sheriff de Nothingham
Gilhem Tell vs. lo baile austriac
Carles Puigdemont vs. jutge Llarena

Òsca a aquestes eròis de la libertat malgrat la repression!

  • 7
  • 2

Escriu un comentari sus aqueste article