De milièrs de personas manifestèron dimècres passat per las carrièras de tot lo Reialme Unit per s’opausar a las manifestacions racistas e mai, en fòrça cases, las prevenir. L’extrèma drecha aviá convocat 39 recampaments dins tota mena de vilas per contunhar de provocar d’incidents violents, coma los qu’avián trebolat l’estat qüadrinacional fa nòu jorns.

Sovent, los manifestants formavan de cadenas umanas per protegir las institucions menaçadas publicament per l’extrèma drecha que n’aviá fach una lista. Es lo cas a Liverpool e Birmingham, ont de grops racistas avián amirat doas glèisas.

A Brighton, ciutat coneguda per sa populacion d’origina caribenca, de milièrs de personas encantonèron los ultradrechistas que s’èran amassats davant un gabinet d’avocats. La superioritat dels contramanifestants foguèt tala que la polícia aguèt d’aparar los racistas del temps que l’eveniment venguèt una mena de carnaval fòra sason, dins la jòia del pòble.

A Sheffield, de grops racistas avián convocat una protèsta contra un espital per enfants, mas de milièrs de manifestants s’i reüniguèron e fin finala l’extrèma drecha s’i presentèt pas.

La polícia britanica, mentretant, contunha d’arrestar de membres de l’extrèma drecha, identificats per aver participat als recampaments violents dels darrièrs jorns.